ನಿನ್ನೆದೆಗೆ ನಾನೇನ ತಂದೆ?

ನನಗಾಗಿ ತೆರೆವ
ನಿನ್ನೆದೆಗೆ
ನಾನೇನ ತಂದೆ?-
ಅದರಿರುವೇ ಮರೆತೆ
ಇದ್ದರೂ
ಅದರ ಆದರ
ನಿಯಮ ಬಾಹಿರ ವೆಂದೆ ಬಗೆದೆ
ನನಗಾಗಿ ತೆರೆವ…

ನಾನು ನಕ್ಕಾಗ ನಕ್ಕು
ಅತ್ತಾಗ ಅತ್ತು
ಪಕ್ಕಾಗಿ ನಿಂತ ನಿನ್ನ
ತುತ್ತು ಕೂಳಿಗಾಗಿ ಬಿದ್ದಿರುವ ಎಲುವಿಲ್ಲದ ಜೀವವೆಂದೆ
ನನಗಾಗಿ ತೆರೆವ…
ನನ್ನ ಲೆಕ್ಕ-
ನಾನು ಬಯಸಿದಾಗಲೆಲ್ಲ
ನೀನೊಂದು
ಖುಷಿ ಕೊಡುವ ಆಟಿಕೆ-
ನಾನು ಹೇಳಿದ್ದು ಕೇಳುವ
ನಾನು ಕೇಳಿದ್ದ ನೀಡುವ
ನಾನು ಹೇಳಿದ್ದ ಮಾಡುವ
ನನ್ನ ಇಷ್ಟದ ಹಾಗೇ ಬದುಕುವ
ಪ್ರತಿಯಾಡದ ಕೇವಲದ ಒಂದು ತೊತ್ತು
ಕಟುವಿನಲಿ
ಕೋಪದಲಿ
ಭರ್ತ್ಸನೆಗೆ ಈಡಾಗುವ ಒಂದು ಪಶು ವೆಂದೆ
ನನಗಾಗಿ ತೆರೆವ…..

ನೀನೊಂದು
ಸಹನೆಯ ಮಣ್ಣಿನ ಮುದ್ದೆ
ನಾನೇನು ಮಾಡಲಿ
ನಾನು ಕ್ಷುದ್ರನಾದೆ ಅಂದರೆ
ನನಗೆ ಸಿಗೋದು
ನಿನ್ನ ವಿಷಾದದ ನಗೆ
*****