ಅರಳುತ್ತಿದ್ದ ಮೊಗ್ಗು
ಮುದುಡಿ ಹೋಯಿತಲ್ಲ
ಕಾಣುತಿದ್ದ ಕನಸು
ಕರಗಿ ಹೋಯಿತಲ್ಲ /ಪ//
ಪುಟ್ಟ ಬೆರಳುಗಳು ಬಿಡಿಸುತ್ತಿದ್ದ
ಅಕ್ಷರಗಳ ರಂಗೋಲಿ
ಅರವಿನ ಬಣ್ಣವ ಪಡೆಯುವ ಮೊದಲೆ
ಕದಡಿ ಹೋಯಿತಿಲ್ಲಿ
ಕದಡಿ ಹೋಯಿತಿಲ್ಲಿ – ತಾಳಿಯ
ನೊಗದ ಭಾರದಲ್ಲಿ
ಮುತ್ತೈದೆ ಎಂದರೆ ಏನೆಂದು
ತಿಳಿವುದಕ್ಕೆ ಮೊದಲೆ
ಮುತ್ತೈದೆ ತಾನಾಗಿ ಹೋಗಿರೆ
ಏನು ಇದಕೆ ಅರ್ಥ
ಏನು ಇದಕೆ ಅರ್ಥ – ಹೇಳಿ
ಇದು ಯಾರ ಸ್ವಾರ್ಥ?
ಕುಣಿದಾಡುವ ಹೆಜ್ಜೆಗಳು ತುಳಿದಿರೆ
ಅಗ್ನಿ ಸುತ್ತಲಿನ ಸಪ್ತಪದಿ
ಹಾರಿದ ಕಿಡಿಗಳು ಅವರನು ಸೋಕಿ
ಹೊರ ಹಾಕದೆ ಒಳ ಬೇಗುದಿ
ಹೊರ ಹಾಕದೆ ಒಳ ಬೇಗುದಿ
ಅರಿಯಿರಿ ಇದರ ಎಲ್ಲ ಬದಿ
*****
