ಎಲ್ಲ ಬಿಟ್ಟು ಇದು ಇಲ್ಲಿಗೆ ಬಂತೆ?
ಅಕ್ಕಿ ತುಂಬ ಬರಿ ಕಲ್ಲಿನ ಸಂತೆ
ಕಾಲ ಚಪ್ಪಲಿ ಕಿರೀಟವ ಜಾಗ ಬಯಸಿ
ಕುರುಡುಬುದ್ದಿಗೆ ಕ್ರೌರ್‍ಯ ಪರಾಕು ಸಲ್ಲಿಸಿ
ಹುದುಕಿಟ್ಟಿದೆ ನಿನ್ನ ಹಟ್ಟಿಗೊಂದು ಹೆಸರ
ಎರಗುವ ಮಂಚೆ ಎರಚಲು ಮುಖಕ್ಕೆ ಕೆಸರ.
ತಾಳಿಕೊ ಮರಿ ತಾಳಿಕೊ
ಮೆಚ್ಚಿದ ಜೀವಗಳೆಲ್ಲ ಬಣ್ಣ ಬಿಚ್ಚುತ್ತಿರಲು
ಕಚ್ಚುವ ಸಂಕಟವನ್ನು ಮೆಟ್ಟಿಕೊ
ಅತ್ತಿಯ ಹಣ್ಣಂಥ ಚಿತ್ತ ಆಕಾರದ ಮರೆಯಲ್ಲಿ
ಹೊತ್ತ ಮೋಸಗಳಿವೆ ಜೋಪಾನ
ಜಾತಿನಾಯಿ ಹತ್ತಲು ಬೆಳೆಯುತ್ತಿದೆ ಸೋಪಾನ
ಸಿಡಿಯಲು ಕಾದಿದೆ ವಿಷದ ಕೊಡಪಾನ.
ಹಿತ್ತಾಳೆ ಕಿವಿಗಳಲ್ಲಿ ತುತ್ತೂರಿ ಬಾಯಿಗಳು
ಪರಾಕು ಸವರಿದ ಪಿಸುಣ ಗೀತಗಳು
ಬೆಳೆಯುತ್ತ ಹೋದಂತೆ ವಿಷವದನನ ಸಾಂತಾನ
ಕೊಳೆಯುತ್ತಿವೆ ಮನೆಯ ಸೌಖ್ಯಗಳು.
*****
