ಹರಿಭಕ್ತಿಸಾರ

ಪೀಠಿಕೆ.

ಭಾ.ಷ.

ಹರಿವ ನದಿಯೊಳು ಮಿಂದ ಮಾತ್ರಕೆ |

ಹರಿಯುವದೆ ದುಷ್ಕೃತ್ಯದೋಷವು? |

ಹರಿಯು ಕಾಂಬನೆ ಬರಿಯ ಜಪತಪ ಹೋಮಹವನಗಳಿ೦ ||

ಉರುತರದ ಶುದ್ಧಾಂತರಂಗದಿ |

ಸ್ಮರಿಸಿದಾಕ್ಷಣ ನಾಮಮಾತ್ರವ |

ಹರಿಯು ಬರುವನು ಬೇಡು ಭಕ್ತನೆ ವರವನೆಂದೆನುತ ||೧||

ಗುರುವು ನುಡಿದೀ ನುಡಿಯನಾಲಿಸಿ |

ತರಳನೊಬ್ಬನು ಬಾಲಭಾವದಿ |

ಗುರುವರೇಣ್ಯರೆ, ನಿಮ್ಮ ಮಾತಿನ ಭಾವವೇನಿಹುದೋ ||

ಅರಿಯೆನೈ ನೀಂ ಪೇಳಿರೆಲ್ಲವ |

ಹರಿಯ ಕಾಣುವದೆಂದರೇನದು? |

ವರವನೀಯುವನಾತನೆಂತೀ ಕಲಿಯ ಕಾಲದಲಿ ||೨||

ಕಂದ, ನಿನ್ನಯ ಮಾತಿನಿಂದಾ |

ನಂದವಾಯಿತು; ಕೇಳು ಪೇಳುವೆ |

ನಿಂದು ವರಹರಿ ಭಕ್ತಿಸಾರವ ನಿನಗೆ ತಿಳಿವಂತೆ ||

ಕಂದ! ನೀ ತಿಳಿದಿರುವೆಯಲ್ಲವೆ? |

“ಚಂದದಿಂ ನೀನೊಂದು ಪಾರವ |

ನಿಂದು ಕಲಿತರೆ’ ಕೊಡುವೆನುಂಡೆಯ” ನೆಂಬ ಮಾತನ್ನು ||೩||

ಹೊಂದಿಸುತ ನೀನೋಡು ಮೇಲಣ |

ಸಂದ ಧರ್ಮೋಕ್ತಿಯನು ನಿನ್ನಯ |

ತಂದೆ ತಾಯ್ಗಳು ತೋರುವಾಶೆಯು ಚಿಕ್ಕ ನುಡಿಯೊಡನೆ ||

ಮಂದಮತಿಗಳು ತಿಳಿಯಲಾರರು |

ಎಂದೆನುತ ಬಹು ಗೂಢತತ್ವವ |

ತಂದಿಹರು ಪೂರ್ವಜರು ತಾವೀ ಸುಲಭರೂಪಕ್ಕೆ ||೪||

ನೋಡದಲೆ ಫಲವನ್ನು ಕರ್ಮವ |

ಮಾಡುವದು ಮೂಢರಿಗಸಾಧ್ಯವು |

ಬೇಡುವರು ಫಲವನ್ನು ತತ್‌ಕ್ಷಣವವರು ಚಡಪಡಿಸಿ ||

ನೋಡುತೀ ಕಷ್ಟವನ್ನು ಹಿರಿಯರು |

ಹೂಡಿದರು ಬಹುದೊಡ್ಡ ಜಾಲವ |

ಗೂಢವಾದಾ ಸ್ವರ್ಗ-ನರಕದ ಪುಣ್ಯ ಪಾಪಗಳ ||೫||

ಮನಕೆ ಸಿಗ್ಗೆನಿಸದಿಹ ಕರ್ಮವ |

ತನಗೆ ಸೇರಿದುದೆಂಬ ಭಾವದಿ |

ಮನದಿ ಫಲದಾಶೆಯನು ತಾರದೆ ಗೈವುದಿದು ನೀತಿ ||

ಜನರು ತಿಳಿಯರಮೌಲ್ಯನೀತಿಯ |

ನೆನುತ ಹಿರಿಯರು ಜೋಡಿಸಿದರೈ |

“ನಿನಗೆ ಪಾಪವು ಬರುವದೆ ” ನ್ನುವ ಭೀತಿಭಾವನೆಯ ||೬||

ನೀತಿ ಭೀತಿಗಳೆಂಬ ಜೋಡಿಗೆ |

ಆತುಕೊಂಡಿತು ಮುಂದಿನಾಶೆಯು |

ಈತರದ ಮೂವಿಧದೆ ನಡೆವವು ಸಕಲಕರ್ಮಗಳು ||

ನೀತಿಯನು ನೋಡುವರು ಪೂಜ್ಯರು |

ಭೀತಿಯಲಿ ನಡೆಯುವರು ನೀಚರು |

ಸೋತು ಸಕಲವ ಮುಂದಿನಾಶೆಗೆ ನಡೆವರುಳಿದವರು ||೭||

ಈಗ ಪೇಳಿದ ಪೂಜ್ಯವರ್ಗದ |

ಯೋಗಿಗಳು ಜಗದೊಳಗೆ ದುರ್ಲಭ |

ರಾಗಿಹರು ಕಲಿಮಹಿಮೆ! ಉಳಿದವರಲ್ಲಿ ಬಹುಜನರು ||

ಆ ಗುಣೋತ್ತಮರಂತೆ ನೀತಿಯ |

ಸೋಗುಗಳ ಕೈಕೊಂಡು ಮನದಲಿ |

ನೀಗಲಾರದೆ ಫಲದೊಳಾಶೆಯ ಕರ್ಮವೆಸಗುವರು ||೮||

ಈ ಪರಿಯ ಫಲದಾಶೆಗೈವರಿ |

ಗಾಪುರುಷರುವದೇಶಗೈದರು |

ವಾಪತಾಪದ ನಾಶ, ಪುಣ್ಯದ ಲಾಭದಾಶೆಗಳ ||

ಪಾಪವೆಂಬುದು ಲೋಕದಲಿತಾ |

ರೂಪುಗೊಂಡಿಲ್ಲೈಯ! ಕಂದನೆ |

ಪಾಪಕಾರ್ಯವಗೈಯೆ ಮನಕಹ ತಾಪವೇ ಪಾಪ ||೯||

ಪುಣ್ಯ ಪಾಪಗಳಲ್ಲಿ ವೈಲ |

ಕ್ಷಣ್ಯವಿರುವದು ಸತ್ಯಕಂದನೆ |

ಪುಣ್ಯಮನಕಾನಂದವೀವುದು ಪಾಪತಾಪಕರ ||

ಪುಣ್ಯವಂತರಿಗಾಗಿ ದೇವರು |

ಪುಣ್ಯಲೋಕವ ನಿರ್ಮಿಸಿಲ್ಲವು |

ಪುಣ್ಯ ಕಾರ್ಯವಗೈಯೆ ಮನಕಹ ಶಾಂತಿಯೇ ಸ್ವರ್ಗ ||೧೦||

ಪರರಿಗುಪಕೃತಿಯಪ್ಪ ಕೃತಿಯನು |

ಪರರನುತಿ ಸ್ವಾರ್ಥಂಗಳೆಣಿಸದೆ |

ತಿರುಗಿಯುಪಕಾರವನು ಬಯಸದೆ ಮಾಡೆ ಪುಣ್ಯವದು ||

ಪರರ ಮನವನನೀತಿಯಿಂದಲಿ |

ಕೊರಗಿಸುವದೇ ಪಾಪಕಾರ್ಯವು |

ನರಕವದರಿಂದುದ್ಭವಿಸುವದು; ಮನವ ನೋಯಿಪುದು ||೧೧||

ನರಕನಾಕಗಳೆಂಬವಿಲ್ಲವು |

ನರರ ಹೃದಯವೆ ನಾಕನರಕಗ |

ಳರಿತು ನಡೆವುದು ಕಂದ ನೀನೀಗೂಢತತ್ವವನು ||

ಹರಿಯಕಾಣುವದೆಂದರೇನೆಂ |

ದರಿವುದಕ್ಕೀ ಮಾತುಪೀಠಿಕೆ |

ತರಳಪೇಳುವೆ ಮುಂದಿನಂಶವ ಕೇಳು ಭಕ್ತಿಯಲ್ಲಿ ||೧೨||

ದೇವರು

ಎತ್ತಿಹಿಡಿದಿಹರಾರು ಭೂಮಿಯ |

ಸುತ್ತಿಸುವರಾರದನು ಸೂರ್ಯನ |

ಸುತ್ತಲೂ ಗರಗರನೆಯನುದಿನ ಗಳಿಗೆ ಬಿಡದಂತೆ ||

ಬಿತ್ತಿರುವ ಬೀಜಗಳ ಮಳೆಯ |

ನಿತ್ತು ಬೆಳಿಸುವರಾರು ಬೆಳಕನು |

ಕತ್ತಲೆಯನಾರುಂಟುಮಾಡಿದರೆಮಗೆ ತಿಳಿಯುವದೇ? ||೧೩||

ಹಾವಿಗಂತಹ ವಿಷವನೀಯುತ |

ಗೋವಿಗಂತಹ ಸುಧೆಯ ನೀಡಿದ |

ನಾವನೆಂಬುದ ಪೇಳಲಾಪೆಯ ಕಂದ! ಕಠಿಣವಿದು ||

ದೇವರೆನ್ನುವ ಮೂರುವರ್ಣಗ |

ಳಾವ ಶಕ್ತಿಯ ತೋರಿಸುವವೋ |

ಆವ ಶಕ್ತಿಯು ಜಗವ ಸೃಷ್ಟಿಸಿ ಬೆಳಿಸಿ ಕೊಲ್ಲುವದೋ ||೧೪||

ಭಕ್ತಿಯಿಂ ಕೇಳುವದು ಬಾಲನೆ |

ಭಕ್ತ ವತ್ಸಲ ದೇವರೆನ್ನುವ |

ಶಕ್ತಿಯೊಂದಿಹುದೀ ಜಗತ್ತಿನೊಳೆಂದು ನಂಬುವದು

ಭಕ್ತರಾದವರಿಷ್ಟ ಕಾರ್ಯಕೆ |

ಶಕ್ತಿಯನು ಸಂಗ್ರಹಿಸಲೋಸುಗ |

ಯುಕ್ತಿಯಿಂದಾ ಶಕ್ತಿಗಿತ್ತರು ಹಲವು ರೂಪಗಳ ||೧೫||

ರೂಪವೊಂದೇ ಸಾಲದೆಂದಾ |

ರೋಪಿಸಿದರದರಲ್ಲಿ ಗುಣಗಳ |

ರೂಪಗುಣಗಳ ಜೋಡಿಗಿತ್ತರು ಹಲವು ಹೆಸರುಗಳ ||

ಈ ಪರಿಯ ನೂರೆಂಟು ನಾಮದಿ |

ರೂಪಗುಣಗಳೊಳಡಗಿಕೊಂಡಿಹ |

ಆ ಪರಮಶಕ್ತಿಯನು ಕಾಣಲು ಭಕ್ತಿಯೇ ಯುಕ್ತಿ ||೧೬||

ಭಕ್ತಿ

ಹೊತ್ತು ಹೊತ್ತಿಗೆ ಮೊಲೆಯನುಣಿಸುತ |

ಎತ್ತಿ ಮುದ್ದಾಡುತ್ತ ಬೆಳಿಸುವ |

ಹೆತ್ತ ತಾಯನು ಕಾಣದಿರೆ ನಿನಗಂದು ಮನದೊಳಗೆ ||

ಎತ್ತ ನೋಡಿದಡತ್ತ ಕಣ್ಣಿಗೆ |

ಕತ್ತಲೆಯೆ ಕಾಣಿಸಿತು ಬಾಲ್ಯದಿ |

ಉತ್ತುಮನೆಯೀ ತಾಯ ಮೇಲಣ ಮಮತೆಯೇ ಭಕ್ತಿ ||೧೭||

ಹರೆಯದೊಳ್ ಪ್ರಿಯತ್ನಿಯೊಳ್ ಮನ |

ಹರಿವು ತಿರುವದು, ಅನ್ನ ನೀರಿನ |

ಪರಿವೆಯಿಲ್ಲದೆ ಕಷ್ಟ ನಷ್ಟಗಳೆಣಿಕೆಯಿಲ್ಲದಲೆ ||

ಹರಿವ ನೀರಿನೊಳುರಿವ ಬೆಂಕಿಯೊ |

ಳಿರದು ಭಯವದಕಿಂಥ ಕವಲುಗ |

ಳಿರದ ತನ್ನಯ ಸತಿಯೊಳಿರ್ಸಾ ಪ್ರೇಮವೇ ಭಕ್ತಿ ||೧೮||

ದುಡಿದು ಗಳಿಸಿದ ಹಣದ ರಾಶಿಯ |

ಮಡದಿ ಮಕ್ಕಳ ಕೈಯೊಳಾದರು |

ಕೊಡಲು ಮನವಿಲ್ಲದಲೆ ಕಾಯುವ ಮೂಢಮಾನವರ ||

ದೃಢತರದ ಧನಲೋಭವೆಂಬುವ |

ಬಿಡದ ಮನದಾಸಕ್ತಿಯೇ ಜಗ |

ದೊಡೆಯ ಶಂಕರನೊಡನೆ ಘಟಿಸಲು ಭಕ್ತಿ ಯೆನಿಸುವದು ||೧೯||

ಭಕ್ತಿಯೆಂಬುದು ಬೇರೆಯಿಲ್ಲವು |

ಯುಕ್ತಿ ಕವಲುಗಳಿರದ ಮನದಾ |

ಸಕ್ತಿಯೇ ನಿಜಭಕ್ತಿಯದರಿಂ ತಮ್ಮ ಮನದೊಳಗೆ ||

ಶಕ್ತಿ ಸಂಗ್ರಹವಾಗಿ ಇಚ್ಛಾ |

ಶಕ್ತಿಯಿಂ ಜಗವನ್ನು ತುಂಬಿದ |

ಶಕ್ತಿಯೊಡನೈಕ್ಯವನು ಪಡೆವುತ ಪಡೆವರಿಷ್ಟವನು ||೨೦||

ಮೂರ್ತಿ ಪೂಜೆ

ಮನದ ಬಯಕೆಯ ಪಡೆಯಲೋಸುಗ |

ಘನಮಹಿಮ ಜಗದೇಕಶಕ್ತಿಗೆ |

ತನಗೆ ಬೇಕಾಗಿರ್ದರೂಪವ ನಿತ್ತು ಪೂಜಿಸುತ ||

ಮನದೆ ಭಾವಿಸುತಲದರ ಗುಣಗಳ |

ತನಗೆ ಬೇಕಾದಂತೆಯೇ ಕಡೆ |

ಗನುನಯದಿ ನಂಬುವನು ತನ್ನಾಧೀನವಾಯ್ತೆಂದು ||೨೧||

ತನಗೆ ವಶವಾಗಿರ್ದ ಶಕ್ತಿಯ |

ತನಗೆ ಬೇಕಾಗಿರ್ದ ಕಾರ್ಯಕೆ |

ಅನುಗೊಳಿಸಿ ಕಳುಹಿಸುವನಾತನು ಮನದ* ಬಲದಿಂದ ||

ಮನದಿ ಹರಿಯಿಹನೆಂಬ ಮಾತಿದು! |

ಜನರು ಗೈಯುವ ದೇವತಾರಾ- |

ಧನೆಯ ಗುಟ್ಟಿದು! ಮಂತ್ರಶಾಸ್ತ್ರದ ಮೂಲತತ್ವವಿದು! ** ||೨೨||

ಭಾವವೇ ಬಲವೆಂಬ ಮಾತಿನ |

ಭಾವವಿದರೊಳಗಿಹುದು ಬಾಲನೆ |

ಭಾವಿಸದಿರನ್ಯಥಾ! ನಂಬುತ ನಡೆವುದೀ ನುಡಿಯ ||

ಆವನಿಚ್ಛಾಶಕ್ತಿ ಬಲವಿಹು |

ದಾವನಲಿ ತನುಮನವನಾಳುವ |

ಭಾವದೈಕ್ಯತೆಯಿರುವದವನೇ ಭಕ್ತಪುಂಗವನು ||೨೩||

ಭೂತದಯೆ

ಲೋಕದಲಿ ನರರಿಷ್ಟ ಸಿದ್ಧಿಗೆ |

ಏಕವಾಕ್ಯತೆಯಿಂದ ವೇಳ್ದರು |

ಲೋಕಸಂಗ್ರಹ ಶಕ್ತಿಸಂಗ್ರಹವೆಂಬ ಮಾರ್ಗಗಳ ||

ಏಕಲಕ್ಷ್ಯದಿ ಶಕ್ತಿ ಸಂಗ್ರಹ |

ವೇಕಲಕ್ಷ್ಯದೊಳಿಷ್ಟ ಸಾಧನ |

ಲೋಕಸಂಗ್ರಹಕಾಗಿ ಹುಟ್ಟಿತು ಭೂತದಯೆ ಜಗದಿ ||೨೪||

ಭೂತದಯೆಯಿಂ ನಡೆವ ಮನುಜಗೆ |

ಭೂತಗಳ್‌ ವಶವಾಗಿ ವರ್ತಿಸ |

ಲಾತ ಪಡೆಯುವನಿಷ್ಟ ಸಿದ್ಧಿಯ ಲೋಕಸಂಗ್ರಹದಿ ||

“ಭೂತದಯೆಯಿಂ ಪ್ರೀತನಾಗುವ |

ಭೂತನಾಥನು” ಎಂಬ ಮಾತಿನೊ- |

ಳೀ ತೆರದ ಗೂಢಾರ್ಥವಿಹುದೈ ಮುದ್ದು ಬಾಲಕನೇ ||೨೫||

ತಾತ್ಪರ್ಯ

ತತ್ವವರಿಯದ ಮೂರ್ತಿಪೂಜೆಯು |

ಸತ್ವ ಹೀನರ ಭೂತದಯೆಯುಂ |

ವ್ಯರ್ಥವಾಗುವವರಿತು ನಡೆವುದು ಕಂದ! ತತ್ವವನು ||

ತತ್ವ ವಿದರಾದಂಥ ಮುನಿಗಳು |

ಸತ್ವ ಶಾಲಿಗಳಾಗಿ ಮನಸಿನ |

ಸತ್ವ ಬಲದಿಂ ಹರಿಯನೋಳ್ಪರು ವರವ ಪಡೆಯುವರು ||೨೬||

*****

** ಪ್ರತಿಯೊಂದು ದೇವತಾರಾಧನೆಯ ಕಾರ್ಯದಲ್ಲಿಯೂ ಆವಾಹನೆ, ಅರ್ಚನೆ, ಧ್ಯಾನ,

ಪ್ರಾರ್ಥನೆ ಎಂಬ ನಾಲ್ಕು ಮುಖ್ಯ ಅಂಗಗಳು ಇದ್ದೇ ಇರುವವು. ಅಖಿಲ ಜಗದ್ವ್ಯಾಪಿಯಾದ

ಈಶ್ವರೀ ಶಕ್ತಿಯನ್ನು ಇಚ್ಛಿತ ಆಕಾರದ ವಸ್ತುವಿನಲ್ಲಿ (ಮೂರ್ತಿಯಲ್ಲಿ) ಸಂಗ್ರಹಿಸುವದೇ ಆವಾಹನೆಯು; ಆ ಆವಾಹ್ನಿತ ದೇವತಾಶಕ್ತಿಗೆ ಭಕ್ತಿಯಿಂದ ಯಥಾಶಕ್ತಿ ಷೋಡಶೋಪಚಾರಗಳನ್ನು ಅರ್ಪಿಸಿ ಅದರಲ್ಲಿ ಅವಶ್ಯಕ ಗುಣಗಳನ್ನು ಆರೋಪಿಸಿ ಆ ಶಕ್ತಿಯ ಪ್ರಕಾಶಕ್ಕೂ ಪೂಜಕನಿಗೂ ಸಂಬಂಧವುಂಟಾಗುವಂಥ ಅನುಕೂಲ ಅವಸ್ಥೆಯನ್ನು ತ೦ದುಕೊಳ್ಳುವದೇ ಅರ್ಚನೆಯು. ಧ್ಯಾನವು ಶಕ್ತಿ ಸಂಗ್ರಾಹಕ ಕಾರ್ಯವು, ಅಂದರೆ ಆವಾಹ್ನಿತ ದೇವತಾಶಕ್ತಿಯೊಡನೆ ತಾದಾತ್ಮ್ಯವನ್ನು ಪಡೆಯುವದು, ಹಾಗು ಈ ರೀತಿಯಾಗಿ ಸಂಗ್ರಹಿಸಿದ ಶಕ್ತಿಯನ್ನು ಇಚ್ಛಿತಕಾರ್ಯದ ಸಾಧನೆಗೆ ನಿಯೋಗಿಸಿಕೊಳ್ಳುವದೇ ಪ್ರಾರ್ಥನೆಯು

* Will-Power