೧
ಬರೆದ ನುಡಿ ಬಂಗಾರ! ಸರಸತಿಗೆ ಸಿಂಗಾರ |
ಚಿರ ಜೀವಿ ನೀನು ಕನ್ನಡದಿ ಚೆನ್ನಿಗನೆ |
ಸರಿಯಾರು ನಿನಗೆ ಸರ್ವಜ್ಞ ||
೨
ನಿನ್ನನುಳಿಸಿದ ಕೀರ್ತಿ | ನಿನ್ನ ಬೆಳಗಿದ ಸ್ಫೂರ್ತಿ |
ಮುನ್ನಾರದಲ್ಲ; ಉತ್ತಂಗಿ ಸಾಹಸದಿ |
ನಿನ್ನನೆತ್ತಿದನು ಸರ್ವಜ್ಞ ||
೩
ಸರ್ವಜ್ಞ ಉತ್ತಂಗಿ | ಉರ್ವರೆಗೆ ಚೆಲು ಭಂಗಿ |
ಗರ್ವದಲಿ ಗುರುಗುಟ್ಟಿ ಫಲವೇನು? ಕನ್ನಡಕೆ|
ಇರ್ವರೇ ದೈವ ಸರ್ವಜ್ಞ ||
೪
ಹೊಗಳಿಕೆಗೆ ಹಿಗ್ಗಿಲ್ಲ | ತೆಗಳಿಕೆಗೆ ತಗ್ಗಿಲ್ಲ |
ಹಗಲಿರುಳು ಜಗದಿ ಜೀವನವ ಪಾವನಗೈಯ್ಯೆ |
ನಗುತ ಬಾ ನೀನು ಸರ್ವಜ್ಞ ||
೫
ನಿನ್ನ ಕವಿತೆಯ ಚೆಂದ | ನಿನ್ನಛಂದೋ ಬಂಧ |
ಇನ್ನಾರಿಗುಂಟು? ಕವಿ ಸಾರ್ವಭೌಮ ನೀ- |
ಕನ್ನಡಕೆ ನನ್ನಿ ಸರ್ವಜ್ಞ ||
*****
ಬೆಂಗಳೂರು : ೧೯೪೩
