ಅದೊದೊದೋ ! ರಾಜಾ ! ರೋರೀರ್‌ !
ರಾಕೀಟ್ ! ಆಮೇಲ್ ಲೇಡಿ !
ಜೋಗಿನ್ ಜಲಪಾತ ಅಂತಂತಾರೆ
ಇವುಗೋಳ್ ನಾಕಕ್ ಕೂಡಿ ! ೧
ನಸ್ಟಕ್ಕ್ ಸಿಕ್ಕಿ ನರಳೊನ್ಗೇನೆ
ಮೇಲಿಂದ್ ಮೇಲೆ ಕಸ್ಟ
ಒದ್ಕೊಂಡ್ ಬಂದಿ ಬಡದ್ ಇಕ್ಕೋದ್ನ್
ಮಾಡ್ತೈತ್ ರಾಜ ಸ್ಪಸ್ಟ ! ೨
ದುಡ್ ಉಳ್ಳೋರು ದುಡ್ ಇಲ್ದೊರ್‍ನ
ಗದರಿಸ್ ಓಡ್ಸೋ ಅಂಗೆ
ರೋರಿರ್ ಸದ್ದು ನೆಪ್ ತರ್‍ತೈತೆ
ಕೇಳ್ತ ನಿಂತ್ರೆ ನಂಗೆ ! ೩
ಬಡವನ್ನ್ ಮುಕ್ಕೊ ಸಾವಿರ್ ಸಂಕ್ಟ
ಜಾಗಾ ಸಾಲ್ದೆ ಒಳಗೆ
ಉಕ್ಕ್ ಬರೋವಂಗ್ ಎದ್ದ್ ಬರ್‍ತೈತೆ
ರಾಕೀಟ್ ಉಳ್ಳಿ ಕೆಳಗೆ ! ೪
ಜಾರ್‍ತ ಲೇಡಿ ತೇಲ್ತ ಬಂದ್ರೆ
ಮೈ ಝುಂ ಝುಂ ಅಂತೈತೆ !
ಬಡವನ್ನ್ ತಿನ್ನೋ ಸಿರಿಮಂತಮ್ಮ
ಬಳಕ್ತೆ ಬಂದಂಗ್ ಐತೆ ! ೫
ಬಡವನ್ ಬಾಯ್ಗೆ ಬೀಗಾನ್ ಇಕ್ಕಿ
ಬಣ್ಣ ಮೇಲ್ ಬಳಿದಂಗೆ
ಜಲಪಾತ್ ಮೇಲ್ ಏನ್ ಕಾಮನ್‌ಬಿಲ್ಲು !
ಆಹ ! ಬಿಲ್ಲಿನ್ ರಂಗೆ ! ೬
ಬಡವನ್ ಬದುಕು ಎದ್ ಬಂದಂಗೆ
ಜೋಗ್ ಕಾಣ್ತಿದ್ರೆ ಕಣ್ಗೆ-
ಸುತ್ತಿನ್ ಕಾಡೂ ಕಾಮನ್ ಬಿಲ್ಲೂ
ನೆಗತಿರ್‍ತಾವೆ ತಣ್ಗೆ! ೭
ಮಿಕ್ಕೋರ್ ಕಸ್ಟ ಕಟ್ಕೊಂಡ್ ಏನು ?
ಔರೋರ್ ಸುಕ ಔರ್‍ಗೆ !
ಪಾನ್ಕ ಕುಡಿಯೋರ್ ಕುಡದ್ ಅನಬೋಸ್ಲಿ!
ವೊರೋರ್ ಒರತಾರ್ ಚೌರ್‍ಗೆ ! ೮
*****