ಇದಾರ ಮನಸು

ಇದಾರ ಮನಸು ಉದಾರ ಮನಸು
ಕನಸುಗಳ ಹೊಸೆಯಿತೊ
ಚಿತ್ರ ಬರೆದು ಬಣ್ಣ ಹಚ್ಚಿ
ಮೂಡುವ ಮೊದಲೆ ಅಳಿಸಿತೊ

ಇದಾರ ಮನಸು ಉದಾರ ಮನಸು
ಭಾವನೆಗಳ ಭಾವಿಸಿತೊ
ಪ್ರೀತಿಯೆಂದು ಕರುಣೆಯೆಂದು
ಕಣ್ಣ ತುಂಬ ತುಂಬಿತೊ

ಇದಾರ ಮನಸು ಉದಾರ ಮನಸು
ಕುಲ ಕೋಟಿಯ ಕಲ್ಪಿಸಿತೊ
ಒಂದರಂತೆ ಒಂದಿರದ ಎಂದೂ ಆವರ್‍ತಿಸದ
ವೈವಿಧ್ಯವ ವಿಧಿಸಿತೊ

ಇದಾರ ಮನಸು ಉದಾರ ಮನಸು
ಕಾಲ ಗತಿಯನಣೆಸಿತೊ
ಇಂದು ನಿನ್ನೆ ನಾಳೆಯೆಂದು
ಅನಂತತೆಯನೆ ಮಣಿಸಿತೊ

ಇಧಾರ ಮನಸು ಉದಾರ ಮನಸು
ಸೌಂದರ್‍ಯವ ಸುರಿಸಿತೊ
ಹಗಲಿನಲ್ಲು ಇರುಳಿನಲ್ಲು
ಭೂವ್ಯೋಮವ ಸ್ಫುರಿಸಿತೊ

ಇದಾರ ಮನಸು ಉದಾರ ಮನಸು
ಮಾಧುರ್‍ಯವ ಹರಡಿತೊ
ಹೆಜ್ಜೆಯಲ್ಲು ಗೆಜ್ಜೆಯಲ್ಲು ಆಲಿಸುವೊಡೆ ನಿದ್ದೆಯಲ್ಲು
ನಾದ ಲಹರಿ ಹರಿಸಿತೊ

ಇದಾರ ಮನಸು ಉದಾರ ಮನಸು
ತನ್ನ ತಾನು ಮರೆಸಿತೊ
ಮನಸೆಂಬುದ ಮನುಷ್ಯನಿಗಿತ್ತು
ನಿಗೂಢತೆಯಲಿ ಇರಿಸಿತೊ
*****