ಬಾರಣ್ಣ ನೀ ನೋಡು
ಕರ್ನಾಟಕಾ ನಾಡು
ದೇವಿ ಚಾಮುಂಡಿಯ ಗುಡಿ ನೋಡು;
ನೋಡುತ್ತ ಕುಣಿಯುತ ನಲಿದಾಡು
ಇನ್ನೆಲ್ಲು ಕಾಣದ
ಮುಂದೆಲ್ಲು ನೋಡದ
ಸೌಂದರ್ಯವಿಲ್ಲಿ ನೋಡು ಬಾರೊ;
ಎದೆಬಿಚ್ಚಿ ರಾಗ ಹಾಡು ಬಾರೊ
ಮುಗಿಲುದ್ದ ಗೋಪುರ
ಮೈಲುದ್ದ ದೇಗುಲ
ಕಣ್ಣಾರೆ ಕಂಡು ನಲಿದಾಡೊ;
ಚಿಂತೆಯ ಮರೆತು ಕುಣಿದಾಡೊ
ಕೊಡಗಿನ ಕಾವೇರಿ
ಮಲೆನಾಡ ಮೈಸಿರಿ
ಜೋಗ ಜಲಪಾತ ನೋಡೊ ಬಾರೊ;
ಚೆಲುವಿನ ಕಡಲಲ್ಲಿ ಈಜು ಬಾರೊ
ಬೆಳ್ಗೊಳದ ಗೊಮ್ಮಟ
ಬಿಜಾಪುರದ ಗೊಮ್ಮಟ
ದಿಟ್ಟತನವನ್ನು ನೋಡು ಬಾರೊ;
ಗಂಡೆದೆಯ ನಿಲುವ ತಾಳು ಬಾರೊ
ಶಿಲ್ಪ ಕಲಾ ಬೇಲೂರು
ಸಿಂಹಿಣಿಗಳ ಕಿತ್ತೂರು
ಪಂಪಕವಿಯ ಬನವಾಸಿ ನೋಡು ಬಾರೊ;
ಭ್ರಾತೃತ್ವದ ಮಾಲೆ ಹಿಡಿದು ಬಾರೊ
ಪಡುವಣದ ಕರಾವಳಿ
ಕಣ್ಣಿಗೆ ಶೋಭಾವಳಿ
ಸಹ್ಯಾದ್ರಿ ಗಿರಿಸಾಲು ನೋಡು ಬಾರೊ;
ಅಭಿಮಾನದ ಗೀತೆ ಹಾಡು ಬಾರೊ
ಭೂದೇವಿ ಮೆಚ್ಚಿದವಳು
ಭಾರತಿಯ ಹಿರಿಮಗಳು
ಭುವನೇಶ್ವರೀ ತವರ ನೋಡು ಬಾರೊ;
ವಿಶ್ವಮಾನವನಾಗಿ ಕೂಡು ಬಾರೊ
*****