ಸೀಗಿ ಹುಣ್ಣಿವೆ ಬಂದಿತ್ತು
ಸಕ್ಕರೆ ಅಚ್ಚು ಮಾಡಿತ್ತು
ರಂಗಿಯ ತಾಯಿ ತಂದಳು
ತರ ತರ ಸಕ್ಕರೆ ಅಚ್ಚುಗಳ
ಲಿಂಗ ತೇರು ಜೋರಿತ್ತು
ಪೂಜಿಸಿ ಹೊಟ್ಟೆ ಸೇರಿತ್ತು
ಜಿಂಕೆ ಕೋಳಿ ಹಸುಗಳ
ಭರ್ಜರಿ ಆಯಿತು ಜಗಳ
ಆರತಿ ತಟ್ಟೆ ಹಿಡಿದ ರಂಗಿ
ಹೊರಗಡೆ ಹೆಜ್ಜೆ ಇಟ್ಟಳು
ಗಾಳಿಗೆ ದೀಪವು ಆರಿತ್ತು
ಕತ್ತಲು ರಸ್ತೆಯ ತುಂಬಿತ್ತು
ಸೀಗಿ ದೇವಿಯ ಗುಡಿಯಲ್ಲಿ
ಸಿಕ್ಕಳು ಗೆಳತಿ ಮುಗಿಲ ಮಲ್ಲಿ
ಜಂಭದ ಕೋಳಿಯು ರಂಗಿ
ಮಲ್ಲಿ ನಿನಗಿಲ್ಲ ಹೊಸ ಅಂಗಿ
ಹೊರಗೆ ಬರುತಿರೆ ಗಾಳಿ
ಅಂಗಿಗೆ ಬಳಿದಿತ್ತು ಧೂಳು
ರಪ ರಪ ಮಳೆಯು ಬಿದ್ದಿತ್ತು
ಸಕ್ಕರೆ ಅಚ್ಚು ಕರಗಿತ್ತು
ನೆನೆದ ರಂಗಿ ನಡುಗಿದಳು
ಅಳುತಲೆ ಮನೆಯ ಸೇರಿದಳು
ಆರತಿ ಹಂಚಿದ್ದರೆ ಗೆಳತಿಯರಿಗೆ
ನಿರರ್ಥಕ ಆಗುತ್ತಿತ್ತೇ ಕೊನೆಗೆ?
*****
