ಆರತಿಯನೆತ್ತೀರೆ ಗಿಣಿನತ್ತು ಗರತೇರೆ
ಸಿದ್ಧಗುರು ಸಿದ್ಧನಿಗೆ ಶುಭವೆನ್ನಿರೆ
ಕಣ್ಣು ಕರಪುರ ದೀಪ ಮನವು ತುಪ್ಪದ ದೀಪ
ಗಾನಗಂಗಾಧರಗೆ ಜಯವೆನ್ನಿರೆ
ಹಸನಾಗಿ ಬನ್ನೀರೆ ಹೊಸಹೂವು ತನ್ನೀರೆ
ಆರು ಚಕ್ರದ ಕಮಲ ಶುಭವೆನ್ನಿರೆ
ನೀತಿ ನಿಜಗುಣ ಗೆಜ್ಜೆ ಹೆಜ್ಜೀಯ ಹಾಕೀರೆ
ಅಂತರಂಗದ ಭಜನಿ ಜಯವೆನ್ನಿರೆ
ಚಿತ್ತ ಮುತ್ತಿನ ಕಳಸಾ ಮನವು ಮಲ್ಲಿಗಿ ಸರಸಾ
ಚಿತ್ತಜನ ಸುಟ್ಹಾಕಿ ಶಿವನೆನ್ನೀರೆ
ಜನುಮ ಜನುಮದ ಗಂಡಾ ಕೋಟಿ ಆತ್ಮರ ಗಂಡಾ
ಪಾರಮಾರ್ಥದ ಗಂಡಾ ಜಯವೆನ್ನಿರೆ
ಹರಕು ಕಂಬಳಿ ಸುಟ್ಟು ಮುರುಕು ಗೊಂಗಡಿ ಬಿಟ್ಟು
ಆರು ಸರ್ಪನ ಮೆಟ್ಟಿ ಗೆಲುವೆನ್ನೀರೆ
ಚರ್ಮ ಜೋಳಿಗಿ ಸಾಕು ಹರನ ಹೋಳಿಗಿ ಬೇಕು
ನಗುಮುಖದ ರಾಣೇರೆ ಗುರುವೆನ್ನೀರೆ
*****
