ಸ್ವಗತ

ನನ್ನ ಎದೆಯನ್ನೇ ಬಗೆದಿಟ್ಟ ಹಾಗಿದೆ
ಹೆಣ್ಣನ್ನು ಗುಳೆ ಎಬ್ಬಿಸುವ ವಿವಾಹವೆಂಬ
ಈ ಶಿಷ್ಟಾಚಾರದ ಗೊಂದಲ ಗಿಜಿ, ಗಿಜಿ

ಯಾರು ಯಾರೋ ಏನೇನೋ ಹೇಳುತ್ತಿರುತ್ತಾರೆ
ಕೇಳುತ್ತಿರುತ್ತಾರೆ
ಒಂದರ ತಲೆ ಬುಡವೂ ಗೊತ್ತಾಗುವುದಿಲ್ಲ

ನಾನು,
ಈ ಜನರ ಕೈಗೊಂಬೆ
ನನ್ನ ನಡೆ ನುಡಿ ಎಲ್ಲಾ ಯಾಂತ್ರಿಕ
ಯಾರು ಏನು ಹೇಳಿದರೂ ಕೇಳಬೇಕು
ಯಾರು ಏನೇ ತೋರಿಸಿದರೂ ಮಾಡಬೇಕು
ಯಾವುದೆಂದರೆ ಅದಕ್ಕೆ
ಯಾವಾಗ ಅಂದರೆ ಆಗ ಸಿದ್ಧವಾಗಬೇಕು.

ಸದ್ಯ –
ನನ್ನ ತಂದೆ ತಾಯಿ ಸ್ಥಿತಿ
ನನ್ನ ಭವಿತವ್ಯದ ತದ್ರೂಪಾಗಿದೆ
ಅವರಿಗೆ, ಇವರಿಗೆ, ಎಲ್ಲರಿಗೂ ಸಮಜಾಯಿಷಿ ನೀಡಬೇಕು
ಎಲ್ಲಕ್ಕೂ ಹೊಣೆಯಾಗಬೇಕು
ಎಲ್ಲಾ ಹೊರಬೇಕು
ಸುಮ್ಮನೆ ಸಾಗಿಸಿಕೊಂಡು ಹೋಗುತ್ತಿರಬೇಕು
ತಮ್ಮನ್ನು, ತಮ್ಮೆದೆಲ್ಲವನ್ನೂ ಮರೆಯಬೇಕು.
*****