ಕನಸು ನನಸುಗಳೆಲ್ಲ ಯಾರಿಗೋ ಮುಡಿಪಾಗಿ

ಕನಸು ನನಸುಗಳೆಲ್ಲ ಯಾರಿಗೋ ಮುಡಿಪಾಗಿ
ಹಾಡುಗಳಲೆಲ್ಲೆಲ್ಲು ಯಾರದೋ ಛಾಯೆಯೇ
ಮೂಡಿರಲು “ಇದು ಯಾರೋ?” ಎನುತ ಕಾತರರಾಗಿ
ಗೆಳೆಯರೆಲ್ಲರು ನನ್ನ ಕಾಡುತಿರೆ, ನಿನ್ನನ್ನೇ
ಬಣ್ಣಿಸಲು ಹೊರಟಿಹೆನು – ನಿನ್ನ ನೆನವಿನಲೆನ್ನ
ಮನದ ಮಾತುಗಳೆಲ್ಲ ರಂಗಾಗಿ ಹಾರುತಿವೆ!
ಒಂದು ಸಂಜೆಯ ಕನಸು ಬಾಳಿನಿರುಳಿನ ಮುನ್ನ
ಮೆರೆದು ಮರೆಯಾಗುವೊಲು ದುಗುಡದಲಿ ಮಾಸುತಿವೆ!

ಮೌನದಲಿ ದುಗುಡದಲಿ ಮುದುಡಿರಲು ಮನದೊಲವು
ಬಣ್ಣನೆಯ ಬಣ್ಣಕ್ಕೆ ನಿಲುಕದಿರೆ ಅದನೆಂತು
ಅರಿಯುವುದು, ಅರಸುವುದು?  ಎದೆಯ ಕಂಬನಿ ಹರಿದು
ಬಾಳ ಬಳಸುತಲಿಹುದು! ನಿನ್ನೊಲವ ಸುಖವಂತು
ಮುಗಿಲ ಮೋಡದ ಹಾಗೆ ಮಾಯವಾಗಿರಲಿಂದು
ಉಳಿದಿಹುದು ಕಂಗಳಿಗೆ ನಿನ್ನ ನೆನಪಿನ ಬಿಂದು!
*****