ಭೂತ ವರ್ತಮಾನ ಭವಿಷ್ಯ
ಅಂದು ಇಂದು ಮುಂದು
ಒಂದೇ ಗರ್ಭದಿಂ ಬಂದು
ಸ್ಫೋಟಗೊಂಡು ಅಂತರಿಕ್ಷದಲಿ
ಬೆರೆತು ಆದವೆ ಬೇರೆ?
ಸಹಸ್ರಾರು ತಾರೆಗಳ ಜನನ
ಒಂದನು ನಮಗಾಗಿ ಕಳಿಸಿರುವ
ಮೂಲ “ಸೂಪರ್ ಪ್ರೋಗ್ರಾಮರ್”
ಇತ್ತಿಹನು ಘಟನಾವಳಿ ಪಟ್ಟಿ ಜಗಜಟ್ಟಿ
ನಿನ್ನ ಸುತ್ತ ತಿರುಗುವವರಿಗೆ
ಬೆಳಕಿನ ಬಿಸಿ ಹಾಲು ಕೊಡಬೇಕು
ಜೀವಿಗಳು ಸಿಹಿ ಬೆರೆಸಿ ಮಾಡಲು ಪಾಯಸ
ಸಕಲ ಜೀವಜಾತಕೆ ಗ್ರಾಸ!
ವಿಕಸನದಿ ಹುಟ್ಟಿಕೊಂಡಿತು ಪ್ರಜ್ಞೆ-
ಬೆಳಕಿನ ಹಾಲು ಸುರಿದದ್ದು ಇಂದೋ
ಅಥವಾ ಎಂದೋ
ಅತೀತವೋ ವರ್ತಮಾನವೋ
ಭವಿಷ್ಯದ ಛಾಯೆಯೂ ಅಡಗಿದೆಯೊ
ಶುರುವಾಯಿತು ಲೆಕ್ಕ
ಮಾನದಂಡಕೆ ಬೇಕೊಂದು ಗಡಿಯಾರ
ಕೊಡಬೇಕು ಅದಕೊಂದು ಮೂರ್ತ ರೂಪ!
ಡವಗುಟ್ಟುವ ಎದೆಯ ತಾಳಕ್ಕೆ
ಅದರ ಟಿಕ್ ಟಿಕ್ ತಳಕು
ಬ್ರಹ್ಮಾಂಡದಲಿ ವಿವಿಧ ವೇಗದ ಬೆಳಕು
ಸಮಯ ಅನಂತ!
ಆದರೂ ಮರ್ತ್ಯರಿಗೆ ಇದೆ ಅಂತ
ಅಂತೆ ಕಂತೆಗಳಲಿ
ಸೋರಿಹೋಗುತಿದೆ
ಬಾಳಿನ ಪಾಯಸ
ಸವಿ ಅದನು ಪ್ರತಿ ಗಳಿಗೆ ಸವಿ
ಹಾರಿಹೋದರೂ ಸಮಯ
ದಕ್ಕಿಸಿಕೋ
ಬೊಗಸೆಯಲಿ ಸಿಕ್ಕದ್ದು
ಬಿಡಬೇಡ ಸೋರಲು
*****
ಕಾಲ ಬ್ರಹ್ಮ
