ಆನೆ ಆನೆ ಆನೆ
ಆನೆ ಬಂತೊಂದಾನೆ
ಪರಿಕಿಸಿದರದು ಭಾರೀ ಸೊನ್ನೆ
ಯೇ ಗುಲಾಮ ಹೇ ಗುಲಾಮ ಇದು ಏನು ಆನೆ
ಎಲ್ಲ ಮುಗಿದ ಮೇಲೂ ಏನು ನಿನ್ನಾನ
ಚೇಳು ಸತ್ತರೂನು ಅದರ ಕೊಂಡಿಯಾನೆ
ಹಿಂಗೆ ಯಾಕೆ ಇಲ್ಲಿ ಕೂತು ಕೊಂಡಾನೆ
ರಾಜ ಮೊದಲು ತಲೆ ಕೊಟ್ಟು ಹೋದಾನೆ
ನಂತ್ರ ಮಂತ್ರಿ ಅವ್ನ ಹಿಂದೆ ಹೊಂಟು ಹೋದಾನೆ
ರಾಣಿಯರು ನಾಶವಾದ ಅಂತಃಪುರದಾನೆ
ಊರು ಕೇರಿ ವಾಸ ವೊಸಿ ವಾಸಿಯಾದಾನೆ
ಕೋಟೆ ಗೀಟೆ ಗೋಡೆ ಗೀಡೆ ಮುರಿದು ಬಿದ್ದಾನೆ
ಒಂದಿರುಳು ಕೊತವಾಲನೆ ಓಟಕಿತ್ತಾನೆ
ಹಾಸ್ಯಗಾರ ಮೊದಲೆ ಮೊಸಳೆ ಬಾಯ್ಗೆ ಸಿಕ್ಕಾನೆ
ಯಾರಿಲ್ಲ ಈಗಲ್ಲಿ ಸುತ್ತಮುತ್ತಾನೆ
ಹಚ್ಚಡವ ಬಿಚ್ಚಿಟ್ಟು ಓಡಿದಾನೆ
ನೀನದರ ಕೆಳಗೆ ಬಚ್ಚಿಟ್ಟಾನೆ
ಯುದ್ಧ ಮುಗಿದ ಮೇಲೆದ್ದು ಬರುವಾನೆ
ಎಲ್ಲಿ ರಾಜ್ಯವೆಂದು ಘೀಳಿಟ್ಟಾನೆ
ಗುಲಾಮ ನೋಡು ಈಗ ನಿನ್ನ ಕಾಲಾನೆ
ಇನ್ನು ಯಾರೂ ನಿನ್ನ ಬಾಲವಿಲ್ಲಾನೆ
ಗೋವು ಗೋಪಾಲ ಎರಡು ನೀನಾನೆ
ನೀನೆ ತೇರು ನೀನದನು ಎಳೆವಾನೆ
ಆನೆ ಮೇಲಂಬಾರಿ ಕುಂತುಕೊಂತಾನೆ
ಕುದುರೆ ಮೇಲೆ ಏರಿದ್ಮಲೆ ರಾವುತಾನೆ
ಪಲ್ಲಕಿಯೊಳಗೂ ಹತ್ತಿ ಕೂತ ಮುದ್ದಾನೆ
ಅದ ಹೊತ್ತು ಹೊರಟಿತೋ ಮದ್ದಾನೆ
ಎಲ್ಲದರ ಮೊದಲಿದ್ದ ಶುದ್ಧಾನೆ
ಎಲ್ಲದರ ಕೊನೆ ಕಂಡ ಖುದ್ದಾನೆ
ಮೊದಲ ದುಃಖ ಕೊನೆಯ ನಗು ಆದಾನೆ
ಆಟ ಮುಗಿಸಿ ಊಟ ಮಾಡಿ ಹೋದಾನೆ
*****
