ಮನಃಸ್ಸಾಕ್ಷಿ

ಸದಾ ನನ್ನ ಮನದೊಳಗೆ
ಮಿಡಿಯುತಿರು ಸಾಕ್ಷಿಯೇ
ಸದಾ ನನ್ನ ಕಿವಿಯೊಳಗೆ
ನುಡಿಯೇ ಮನಃಸಾಕ್ಷಿಯೇ

ನನ್ನ ನಾಲಿಗೆಯಲಿ ಇರು ನೀನು
ನನ್ನ ನಗೆಯಲ್ಲಿ ಇರು ನೀನು
ಸದಾ ನನ್ನ ಬಗೆಯಲ್ಲಿರು
ಸದಾ ನನ್ನ ಬೆಳಕಾಗಿರು

ಕಣ್ಗುರುಡ ನಾ ಕಾಣದೆಯೇ
ತಪ್ಪು ಹೆಜ್ಜೆಯಿಡುವಾಗ
ನ್ಯಾಯ ಯಾವುದನ್ಯಾಯ ಯಾವುದು
ಸತ್ಯ ಯಾವುದಸತ್ಯ ಯಾವುದು
ಹಿತ ಯಾವುದಹಿತ ಯಾವುದು
ಪುಣ್ಯ ಯಾವುದು ಪಾಪ ಯಾವುದು
ಎಂದು ನಾ ತಿಳಿಯದಾಗ

ಅನ್ಯತ ನಾನು ನುಡಿಯದಂತೆ
ಇರು ನನ್ನ ಮಾತಿನಲಿ
ಯಾರ ಮೇಲೂ ಎರಗದಂತೆ
ಇರು ನನ್ನ ಕೈಗಳಲಿ
ಭಾವವೆಂದೂ ತಪ್ಪದಂತೆ
ಇರು ನನ್ನ ಭಾವನೆಯಲಿ

ಅಂತರ್‍ಯಾಮಿ ನೀನೇ ನನ್ನ
ಸರ್‍ವಸಾಕ್ಷಿ ನೀನೇ ನನ್ನ
ಬೇರೆ ನನಗೆ ದೈವವಿಲ್ಲ
ಬೇರೆ ನನಗೆ ಧರ್ಮವಿಲ್ಲ

ಮೃದುವಾಗಿಸು ನನ್ನ ಮಾತ
ಕರುಣೆಯಾಗಿಸು ನನ್ನ ಕಣ್ಣ
ಪ್ರೀತಿಯಾಗಿಸು ನನ್ನ ತುಟಿಯ
ಶಾಂತಿಯಾಗಿಸು ನನ್ನ ಮುಖವ

ಓ ನನ್ನ ಸಾಕ್ಷಿ
ಮನಃಸ್ಸಾಕ್ಷಿ
*****