ಈ ಗತಿಶೀಲ ಜಗದಲ್ಲಿ

ಈ ಗತಿಶೀಲ ಜಗದಲ್ಲಿ
ಅತಿಯಾಗದೆ ಇರು ಇತಿಯಾಗದೆ ಇರು
ಶ್ರುತಿ ಮಾಡಿದ ವೀಣೆಯ ಹಾಗಿರು

ನುಡಿಸುವ ಗಾಯಕ ನುಡಿಸುವ ವೇಳೆಗೆ
ನಡೆಸುವ ಗುರು ನಡೆಸುವ ವೇಳೆಗೆ
ತಡವರಿಸುವ ಭಯ ಯಾತಕೆ ಹೇಳು

ಮಗುವಿನ ಸೋಜಿಗ ಅಂತೆಯೆ ಇರಲಿ
ನಗುವಿನ ಚೆಲುವು ಮಾಯದೆ ಇರಲಿ
ಮುಗಿಲ ರೂಪಗಳು ಬದಲಾಗುತ ಇರಲಿ
ಹಗಲಿರುಳುಗಳು ಮುಗಿಯದೆ ಇರಲಿ

ಮಿಡಿಯಲಿ ಮನ ಮೋಹನ ಮುರಲಿಗೆ
ತುಡಿಯಲಿ ಎದೆ ಜೀವನ ಪ್ರೀತಿಗೆ
ಒಡಲಾಳದ ನಿಜ ಕ್ಷಣದಿಂದ ಕ್ಷಣಕೆ
ತಡೆಯಾಗಲಿ ಸಂಕಲ್ಪ ಹಿಂಸೆಗೆ

ಇರು ದಾರಿಯ ಬೆಳಕಿನ ಹಾಗೆ
ಸುರಿ ಅರೆಗಾಲದ ಮಳೆಯ ಹಾಗೆ
ಆರ್ದ್ರವಾಗು ಬುದ್ಧ ಭಗವಾನನ ಕರುಣೆಯ ಹಾಗೆ
ನಿದ್ರಿಸುವುದಾದರೆ ನಿದ್ರಿಸು
ತಾಯ ತೊಡೆಯಲಿ ಹಸುಳೆ ನಿದ್ರಿಸುವಂತೆ
*****