ನಾಳೆ ಎಂಬುದು ಹಾಳು ಕಾಣಿರೊ

ನಾಳೆ ಎಂಬುದು ಹಾಳು ಕಾಣಿರೊ – ಓ ನರ ಮಾನವರೇ
ನಾಳೆ ಎಂಬುದು ಹಾಳು ಕಾಣಿರೊ \\ಪ\\

ಇಂದು ಮಾಡುವುದು ಉತ್ತಮವು
ಈಗಲೆ ಎಂಬುದು ಅತ್ಯುತ್ತಮವು \\ಅ.ಪ.\\

ಗತಿಸಿದ ಕಾಲ ಬರುವುದೆ ಹೇಳು
ನುತಿಸಿದ ದೈವ ಹೆಲ್ಪ್‌ಲೆಸ್ ಕೇಳು!
ಒಡೆದ ಗಾಜು ಕೂಡುವುದಿಲ್ಲ
ಮಡಿದ ಮನುಜ ಮರಳುವುದಿಲ್ಲ

ನಾಳೆಯನಾರೂ ಕಂಡವರಿಲ್ಲ
ವೀಳೆಯವನ್ನು ತೊರೆದವರಿಲ್ಲ
ಸಂದ ಕಾಲವ ಒದ್ದರೆ ಕಾಲಲಿ
ನಿನಗೇನುಂಟು ಹೇಳು ಜಗದಲಿ?

ಹೋದವರಾರೂ ಬಂದವರಿಲ್ಲ
ಬಂದವರಿಲ್ಲಿ ಉಳಿಯುವುದಿಲ್ಲ
ಸಂದ ದಿನದಲಿ ಸಲ್ಲದೆ ಹೋದರೆ
ಸಂದಾಯವೇನು ಹೊಂದಿದ ಜನ್ಮಕೆ?

ಕಾಲವನಾರೂ ಗೆದ್ದವರಿಲ್ಲ
ಕಾಲನೆ ಶರಣು ಅದಕ್ಕೆ ಇಲ್ಲಿ
ಇದರ ವಿವೇಚನೆ ವರ್ತಮಾನವು
ಇನ್ನೇತಕೆ ಜೋತಿಷ್ಯ ಭವಿಷ್ಯವು?
*****