ನೀರು… ನೀರು… ನೀರು…
ಬದುಕಿಗೆ ಅಲ್ಲವೆ ಅದು ಬೇರು
ಬೇರು ಇಲ್ಲದ ಮರವುಂಟೆ?
ಇದ್ದರೂ ಅದಕೆ ಉಸಿರುಂಟೆ?? /ಪ//
ಗೆದ್ದನು ಜಗವ ಅಲೆಗ್ಸಾಂಡರ
ಕಡೆಗೆ ಸತ್ತನು ಕಾಣದೆ ನೀರ
ಹೆಣ್ಣನು ಗೆದ್ದ ಭಾವ ಮದಲಿಂಗ
ಕೂಡ ಸೇರಿದ ಅದೇ ಜವನೂರ
ಏನೇ ಆದರೂ ಏನೇ ಹೋದರೂ
ಅಲ್ಲಿ ಪ್ರವಾಹ, ಇಲ್ಲಿ ಬರ
ಈ ನಿಜಕಿಂತಲೂ ಆಳದ ನಿಜವು
ನಮ್ಮ ವಿವೇಕಕೆ ಕೂಡ ಬರ!
ನೀರಿಗೆ ನಾವ್ ಬೆಲೆ ಕೊಡಲೇ ಇಲ್ಲ
ಅದಕೆ ಬಾಟಲಿ ಸೇರಿದೆ ನೀರು
ಆದರೂ ಶ್ರೀಮಂತ ಹುಂಬತನ
ಅದಕೆ ಪಶುಪಕ್ಷಿಗೆ ಕಣ್ಣೀರು
ಇದನು ಕಂಡಿದೆ ಬೆಟ್ಟ ಅರಣ್ಯ
ಕೊಡಲಿ ಪೆಟ್ಟನು ಬುಡದಲಿ ತಿಂದು
ಸತ್ತರೆ ಭೂಮಿ ಕಾಯ್ವುದೆ ಗಗನ
ಎಂದು ಕೇಳಿದೆ ನಿಸರ್ಗ ನೊಂದು !
*****
