ಗಣಪತಿರಾಯಾ

ಜಯದೇವಾ ಜಯದೇವಾ ಶ್ರೀ ಗಣಪತಿರಾಯಾ
ಭಯಕಾರಕ, ಭಯಹಾರಕ, ಓಂಕಾರ ಕಾಯಾ ||ಜಯದೇವಾ||

ಜಗದಂಬೆಯ ಮೈಮಣ್ಣಲಿ ಮೂಡಿದ ಮೂರುತಿಯೆ
ಮೃಗಧರ ನೋಡಿದ, ಮಾಡಿದ ಬೇರೆಯ ಆಕೃತಿಯೇ
ಚಿಗುರಾಗಿದೆ ನಿಂನಾಲಿಗೆಯಲಿ ದಿನ-ದಿನ ಶ್ರುತಿಯೇ
ಹಗಲಾಯಿತು ನಿಂನೆನಪೇ, ಸುಳ್ಳಾಯಿತು ಮೃತಿಯೇ ||ಜಯದೇವಾ||

ಗಣನಾಯಕ, ಕವಿಗಾಯಕ, ಜನತ್ರಾಯಕ ಸಿರಿಯೇ
ಗುಣವರ್ಧಕ, ಖಲಮರ್ದಕ, ಸುರಸ್ಪರ್ಶಕ ದೊರೆಯೇ
ಅಣು ಅಣುವೂ ತೃಣರೇಣುವು ಗುಣಗಣವೆಂದರಿಯೇ
ಕ್ಷಣ, ಕ್ಷಣವೂ ನಾ ಸಿದ್ಧನು ನಿನ್ನೊಂದಿಗೆ ಬೆರೆಯೇ ||ಜಯದೇವಾ||

ಮೋದಕ ತುಂಬಿದ ಬಸಿರಲೆ ನಡೆಸಿರುವೆಯೊ ನೃತ್ಯ
ಬೋಧಕ ದೃಷ್ಟಿಯು ಬರಿವುದು ಮೌನದ ಸಾಹಿತ್ಯ
ಶೋಧಕ ದೃಷ್ಟಿಯ ಸೃಷ್ಟಿಯು ನಿನ್ನದೆ ಶತಕೃತ್ಯ
ನಾದದ ಮೂಲ ಸ್ವರೂಪವೆ ನಾ ನಿನ್ನಯ ಭೃತ್ಯ ||ಜಯದೇವಾ||
*****