ಹಾರಯ್ಕೆ

೧
ಕೆಳದಿಯರನೊಡಗೊಂಡು ಕೆಲೆಕೆಲೆ-
ದುಲಿದು ಮೇಲಕೆ ಹಾರಿ,
ಇಳೆಯವರನಣಕಿಸುತೆ ಪಕ್ಕವ
ಕೆಳರಿ ಬಾನೆಡೆಗೇರಿ,

ತಳರುತಿಹೆ ನೀನೆಲ್ಲಿ? ಹಕ್ಕಿಯ-
ಕುಲದರಸೆ ಹೇಳಿಲ್ಲಿ!
ಗೆಳೆಯನೆಡೆ ದೊರೆಯುವುದೆ ನೀನಡೆ-
ದುಳಿವ ದಾರಿಯೊಳೆಲ್ಲಿ?

ದೊರೆತರಾತಗೆ ನೀನು….
ದೊರೆತರಾತಗೆ ನನ್ನ ಬಾಳಿನ
ಕೊರಗನರುಹುವೆಯೇನು?

೨
ಅಳತೆಯಿಲ್ಲದ-ಹೊಳೆವ-ಕೈಗಳ
ಕಳುಹಿ ವಿಶ್ವದೊಳೆಲ್ಲಾ
ಬೆಳಕುಬಣ್ಣವ ಬಳೆವ ತಾವರೆ-
ಗೆಳೆಯ ಲಾಲಿಸು ಸೊಲ್ಲಾ!

ನನ್ನ ಮನದಳಲನ್ನು ಬರೆದಾ
ಬಿನ್ನವತ್ತಳೆಯನ್ನು
ಚೆನ್ನನಿರುವಲಿ ಕಳುಹಲಿಹೆ, ನೆರ-
ವನ್ನು ನೀಡುವೆಯೇನು?

ಒಂದೆ ಒಂದಾ ಕೈಯ….
ಒಂದೆ ಕಿರುಗೈ ಕಳುಹಿ ಓಲೆಯ-
ನೊಂದಿಸಾತಗೆ ಜೀಯ!

೩
ಮುಮ್ಮಳೆಯ ಕಮ್ಮುಗಿಲ ಸಿಡಿಲೇ
ಹೆಮ್ಮಗಳ ಮೊರೆಕೇಳಿ
ಒಮ್ಮೆ ಒಂದೇ ನಿಮಿಷ ಕೊಡುವಿರೆ
ನಿಮ್ಮ ಗುಡುಗನು? ಹೇಳಿ!

ನಲ್ಲನೆಲ್ಲಿಹನೇನೊ! ನನ್ನದು
ಮೆಲ್ಲಲಿಯ ದನಿ ಕೇಳದು,
ಎಲ್ಲಿಯೇ ಇರಲವಗೆ ಸುದ್ದಿಯ
ಸಲ್ಲಿಸಲೆ ಬೇಕಿರುವುದು,

ಗುಡುಗಿನಾ ಮೊಳಗಿಂದೆ…
ಗುಡುಗಿ ಗರ್ಜಿಸಿ ನನ್ನ ನೆನಹನು
ಕೊಡುವೆನಾತನಿಗಿಂದೆ..

೪
ಗಗನದೊಳು ತೇಲಾಡುತಾಡುತ
ನಗುವ ಚುಕ್ಕಿಯ ಬಳಗವೆ,
ಸೊಗಸು ನಿಮ್ಮದು ಬದುಕು ನೀವೀ
ಜಗದ ಸಾಕ್ಷಿಗಳಲ್ಲವೇ?

ಮಿಣುಕುನೋಟದೊಳೇನನೆಲ್ಲವ-
ನಿಣುಕುತಿಹ ಧ್ರುವತಾರೆಯೆ,
ಕ್ಷಣವೆ ನಿನ್ನಯ ಕಣ್ಣ ಬಲುಹನು
ನನಗೆ ನೀಡುಪಕಾರಿಯೆ!

ಅವನನೊಮ್ಮೆಯೆ ನೋಡಿ….
ಅವನ ನೋಡುತ ನಲಿದು ಹಾಡುವೆ
ಕವನ ನಿನ್ನದು ಮಾಡಿ.

೫
ಬೇಸಗೆಯ ಬಿರುಗಾಳಿ, ನಿನ್ನದಿ-
ದೇಸು ನಡಿಗೆಯ ವೇಗ?
ತಾಸುಹೊತ್ತೆರವದನು ಕೊಟ್ಟರೆ
ಗಾಸಿ ನಿನಗೇನೀಗ?

ನಿನ್ನ ತೆರದೊಳೆ ನೀರು-ನೆಲ-ಮುಗಿ-
ಲೆನ್ನದೆಯೆ ನಾ ಹಾರಿ,
ಚೆನ್ನನಿರುವಲಿ ತೆರಳುವೆನು, ಆ-
ನನ್ನಿ ಕಾರನ ಸೇರಿ

ಬೆರೆಯುವೆನು ನಾನಾಗ….
ಬೆರೆಯುವೆನು ನಾನಾಗ ಪಡೆವುದು
ಮರಳಿ ನಿನ್ನಯ ವೇಗ.
*****