ಮದುವೆಗೆ ಮುಂಚೆ

ಮದುವೆಗೆ ಮುಂಚೆ ಉರಿಮೀಸೆ
ಉದ್ಯೋಗದಲ್ಲಿ ಅಡ್ಡಮೀಸೆ ಅರ್ಥಾತ್ ಒಂಭತ್ತು ಕಾಲು ಮೀಸೆ
ಮದುವೆಯಾದ ಮೇಲೆ ಯಾಕೊ ಇಳಿಮೀಸೆ
ಮಕ್ಕಳಾದ ಮೇಲೆ ಯಾಕೊ ಅದೂ ಕೂಡ ಇಲ್ಲ
ಜೊತೆಗೆ ತಲೆ ಕೂಡ ಬೋಳು
ಬಾಯ್ಬಿಟ್ಟರೆ ಅಲ್ಲಿ ಗೋಳು
ಅಂತೂ ಬಾಳು ಹಾಳು – ಇದು
ಯಾವ ಪುರುಷಾರ್ಥಕೆ ಹೇಳು?

ಪ್ರೇಮವೇ ಇದರ ಮೂಲ
ತಪ್ಪಿತು ಅಲ್ಲೇ ತಾಳ
ಹತ್ತದೇ ಗೌರಿ ಶಂಕರ
ಪ್ರಪಾತದಲ್ಲಿ ಹರಹರ
ತಿಳಿದವರು ಹೇಳಿದ್ದರೂ ಕೂಡ
ಯಾಕೊ ಏನೊ
ಇಳಿಜಾರಿನಲೆ ನಮ್ಮ ಓಟ!

ಬಿದ್ದಿದ್ದಂತೂ ಆಗಿದೆ;
ನಡೆವವ ಎಡವಿದ ಹಾಗೆ
ಮೇಲಕ್ಕೆ ಏಳಲೆಬೇಕು
ಯಾವುದೂ ಅಸಾಧ್ಯವಲ್ಲ
ಹಿಂದಿನ ಕತೆಯ ಬಿಟ್ಟು ಬಿಡು
ಅದು ಭೂತ ನಿಜ ಭೂತ
ಹೆಜ್ಜೆ ಇಟ್ಟರೆ ಮುಂದೆ
ನಿನ್ನದೆ ಭವಿತವ್ಯ
ಅದೆ ದಿವ್ಯ ಭವ್ಯ
*****