ಮುತ್ತಿನ ಮಳೆ – ಚಿಲುಮೆ

ಸೂಚಕ

ಎತ್ತಿದ ನರನ ಕೈ ಭಯಸೂಚಕ ಎತ್ತಿದ ನಾರಾಯಣನ ಕೈ ಅಭಯಸೂಚಕ. *****

ಮೋಹದಲ್ಲಿ ದೇಹ ಬೆಳೆಯುತ್ತದೆ ತ್ಯಾಗದಲ್ಲಿ ಆತ್ಮ ಬೆಳಗುತ್ತದೆ. *****

ಅಕ್ಷರದಿ ಬರೆದ ಕಣ್ಣು ಕಣ್ಣೀರ ಸುರಸೀತೇ? ಅಕ್ಷರದಿ ಬರೆದ ಹೃದಯ ಪ್ರೀತಿ ಬೀರೀತೇ? ಭಾವ ಬೆಸುಗೆ ಇರೆ ಸುರ ಸೀತು ಕಂಬನಿ ಎದೆಯಾಳ ಪ್ರೀತಿ *****

ದೇಹದ ಚೈತನ್ಯಕ್ಕೆ ನಗುವೆ ನಂದಾದೀಪ. *****

ದೇಹ ಒಂದು ಕವಿತೆ * ಆತ್ಮ ಒಂದು ಕಾವ್ಯ * ಪರಮಾತ್ಮ ಒಂದು ಮಹಾಕಾವ್ಯ *****

ದೇಹ ಒಂದು ತುಂಡು ರೇಖೆ. ಆತ್ಮ ಒಂದು ಅನಂತ ರೇಖೆ. *****

ಹಾಳೆಯಲಿ ಬರೆದ ಅಕ್ಷರ ಕಣ್ಣ ಮರೆ ಹೃದಯದಲಿ ಕೊರೆದ ಅಕ್ಷರ ಪ್ರೀತಿ ಅಕ್ಷಯ. *****

ಉಯ್ಯಾಲೆ ತೂಗಿ ತೂಗಿ ತೇಲುತ್ತದೆ ದಾರಿ ಮಲಗಿದಲ್ಲಿ ಮಲಗಿರುತ್ತದೆ ಉಯ್ಯಾಲೆ ನಿಂತಾಗ ದಾರಿ ಎದ್ದು ನಡೆಯುತ್ತದೆ. *****

ಆಗಸದ ಕೊಡೆಯಕೆಳಗೆ ಭೂಮಿಯ ಜಮಖಾನ ಹಾಸಿ ಕರೆದು ಕುಳ್ಳಿರಿಸಿ ಭೇಟಿ ಇತ್ತಿದ್ದ ಭಗವಂತ. *****

ಇಡೀ ರಾತ್ರಿ ಚಿಂತಿಸಿ ಜೀರೋಬಲ್ಬ್ ಬರೆಯುತ್ತದೆ ‘ಬೆಳಗು’ ಎಂಬ ಮಹಾಕಾವ್ಯ. *****