ಈ ಪೇಟೆಗೊಂದು ಒಳಚರಂಡಿ
ವ್ಯವಸ್ಥೆ ಬೇಕೆ ಬೇಡವೆ ಹೇಳಿ, ಹೋಟೆಲು
ಕಸಾಯಿಖಾನೆಗಳಿಂದ ಹರಿಯುವ ಕೊಚ್ಚೆ
ರೋಡಿನ ಮೇಲೆ ಹಪ್ಪುಗಟ್ಟುತ್ತದೆ.
ಜರಿಯಬೇಕೆ ಇಲ್ಲಿ, ಸಂಜೆಗೆ ಹಾಯಾಗಿ
ವಾಯು ಸೇವನೆಗೆ ಅಡ್ಡಾಡುವ ನಮ್ಮ ಮಂಡಿ?

ಹಾಗೇನೆ ಒಂದು ಸಾರ್ವಜನಿಕ ಮೂತ್ರ ದೊಡ್ಡಿ
ಇಲ್ಲದೆ ಬರುವ ಕಷ್ಟ ಎಲ್ಲರಿಗೂ ಗೊತ್ತು
ಈಗಿರುವ ಮರಗಿಡಗಳೆಷ್ಟು ಜನಕ್ಕೆ ಸಾಕು?
ಮುರಿದ ಗೋಡೆಗಳು ಬರುತ್ತವೆಷ್ಟು ದಿನಕ್ಕೆ?
ಒದ್ದೆಯಾಗಬೇಕೆ ಹೀಗೆ ಕ್ಷಣವೂ ಪುರುಸೊತ್ತಿಲ್ಲದ
ಆಧುನಿಕ ಮನುಷ್ಯನ ಚಡ್ಡಿ?

ಬೇಕು ಮುಂದರಿದ ಮಹಿಳೆಯರಿಗೊಂದು ಕ್ಲಬ್ಬು
ಒಂದು ಬ್ಯೂಟಿ ಸೆಲೂನು ಎಲ್ಲರಿಗೂ
ಒಂದು ಈಜುಕೊಳ.  ಹೊಸ ಆಶಯಗಳನ್ನು
ಒಳಗೊಳ್ಳುವುದಕ್ಕೆ, ಈ ಪೇಟೆಯ
ಸೌಂದರ್ಯಗಳನ್ನು ಹೆಚ್ಚಿಸುವುದಕ್ಕೆ, ಇದ್ದವರಿಗೆ
ಕರಗಿಸುವುದಕ್ಕೆ ತೊಡೆಗಳ ಕೊಬ್ಬು

ಬೇಡವೇ ಚಿಕ್ಕ ದೊಡ್ಡ ಪಾರ್ಕುಗಳು ಅಲ್ಲಲ್ಲಿ?
ಉದಾ: ಮುನಿಸಿಪಾಲಿಟಿ, ತಾಲೂಕಾಫೀಸು,
ತಲೆತಲಾಂತರಗಳ ಕುಟುಂಬಸ್ಥರ ಮನೆ
ಮುಂದೆ, ಎಲ್ಲರಿಗೂ ಕಾಣಿಸುವಂತೆ.  ಇಲ್ಲದಿದ್ದರೆ
ಈ ಸ್ಥಳೀಯ ಶ್ರೇಷ್ಠರ ಪ್ರತಿಮೆಗಳನ್ನು
ನಿಲ್ಲಿಸಬೇಕು ಯಾರು ಎಲ್ಲಿ?

ಕೊಡಬೇಕು ದೊಡ್ಡವರಿಗೆ ದೊಡ್ಡವರ ಸ್ಥಾನ
ಮುಂದಾಳುಗಳನ್ನು, ಮನೆತನ ಉಳ್ಳವರನ್ನು
ಗೌರವಿಸಬೇಕು, ಈ ನೆಲದ ದರಿದ್ರ ಧೂಳು
ಸೋಂಕದಂತೆ.  ಬರಿಗಾಲಲ್ಲಿ ನಡೆಯದವರನ್ನು
ಎಲ್ಲರೊಂದಿಗೆ ಮಲಗಿಸುವುದೆಂದರೇನು!
ಬೇಕು ಈ ಪೇಟೆಗೊಂದು ಸ್ಪೆಶಲ್ ಶ್ಮಶಾನ
*****

ತಿರುಮಲೇಶ್ ಕೆ ವಿ

ಕಾಸರಗೋಡಿನ ಕಾರಡ್ಕ ಎಂಬಲ್ಲಿ ೧೯೪೦ ರಲ್ಲಿ ಜನನ. ಕಾಸರಗೋಡು, ತಿರುವನಂತಪುರ, ಹೈದರಾಬಾದುಗಳಲ್ಲಿ ವಿದ್ಯಾಭ್ಯಾಸ. ಇಂಗ್ಲೀಷ್ ಸಾಹಿತ್ಯದಲ್ಲಿ ಎಂ. ಎ.; ಭಾಷಾಶಾಸ್ತ್ರದಲ್ಲಿ ಪಿಎಚ್.ಡಿ. ಕೇರಳದ ಹಲವೆಡೆ ಇಂಗ್ಲೀಷ್ ಅಧ್ಯಾಪಕರಾಗಿ ವೃತ್ತಿಜೀವನ ಆರಂಭ; ಆನಂತರ ಹೈದರಾಬಾದಿನ ಉನ್ನತ ಶಿಕ್ಷಣ ಸಂಸ್ಥೆ ಸೆಂಟ್ರಲ್ ಇನ್ಸ್‌ಟಿಟ್ಯೂಟ್ ಆಫ್ ಇಂಗ್ಲಿಷ್ ಎಂಡ್ ಫಾರಿನ್ ಲಾಂಗ್ವೇಜಸ್‌ನಲ್ಲಿ ಪ್ರಾಧ್ಯಾಪಕ.೨೦೦೨ರಲ್ಲಿ ನಿವೃತ್ತಿ.ಅಮೇಲೆ ಅಮೆರಿಕ, ಯೆಮೆನ್ ದೇಶಗಳಲ್ಲಿ ಅಧ್ಯಾಪನ. ಸದ್ಯ ಹೈದರಾಬಾದಿನಲ್ಲಿ ವಾಸ್ತವ್ಯ. ‘ಮುಖಾಮುಖಿ’ ಕವನಸಂಕಲನಕ್ಕೆ ಕೇರಳದ ಕುಮಾರನ್ ಆಶಾನ್ ಅವಾರ್ಡ್ ಮತ್ತು ಕಾಂತಾವರದ ವರ್ಧಮಾನ ಪ್ರಶಸ್ತಿ; ‘ಅವಧ’ ಕವನ ಸಂಕಲನಕ್ಕೆ ಮತ್ತು ‘ಸಮ್ಮುಖ’ ಲೇಖನ ಸಂಕಲನಕ್ಕೆ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಮತ್ತು ‘ಅಕ್ಷಯ ಕಾವ್ಯ’ ಕೃತಿಗೆ ಕೇಂದ್ರ ಸಾಹಿತ್ಯ ಅಕಾಡೆಮಿಯ ೨೦೧೫ರ ಸಾಲಿನ ಪ್ರಶಸ್ತಿ ಲಭಿಸಿದೆ. ಅಲ್ಲದೆ, ಪುತ್ತೂರು ಕರ್ನಾಟಕ ಸಂಘದ ನಿರಂಜನ ಪ್ರಶಸ್ತಿ, ಮತ್ತು ಶಿವಮೊಗ್ಗ ಕರ್ನಾಟಕ ಸಂಘದ ಹಾ.ಮಾ.ನಾ. ಪ್ರಶಸ್ತಿಗಳೂ ದೊರಕಿವೆ.ಕರ್ನಾಟಕ ಸಹಿತ್ಯ ಅಕಾಡೆಮಿಯ ಗೌರವ ಸಾಹಿತ್ಯ ಪ್ರಶಸ್ತಿಗೂ ಇವರು ಪಾತ್ರರಾಗಿದ್ದಾರೆ. ತಿರುಮಲೇಶ್ ಇಂಗ್ಲೀಷ್‌ನಲ್ಲೂ ಹಲವಾರು ಲೇಖನಗಳನ್ನು ಮತ್ತು ಪುಸ್ತಕಗಳನ್ನು ಬರೆದಿದ್ದಾರೆ.
*****
ತಿರುಮಲೇಶ್ ಕೆ ವಿ

Latest posts by ತಿರುಮಲೇಶ್ ಕೆ ವಿ (see all)