ಎತ್ತ ಸಾಗಿದೆಯೊ ಕನ್ನಡ ರಥವು
ತಿಳಿಯುತಿಲ್ಲವಲ್ಲ
ಹಿಂದಕೊ ಮುಂದಕೊ ಬೆಟ್ಟಕೊ ಕಡಲಿಗೊ
ಅಯೋಮಯವು ಎಲ್ಲ || ಪ ||
ಕನ್ನಡಕ್ಕೇಳು ಜ್ಞಾನಪೀಠಗಳು
ಬೀಗುತಿರುವೆವಲ್ಲಾ
ಕುಸಿಯುತಲಿರುವ ನೆಲವು ಕಣ್ಣಿಗೆ
ಕಾಣುತಿಲ್ಲವಲ್ಲ
ಕವಿಗಳು ದಾಸರು ಶರಣರು ಸಂತರು
ಕನ್ನಡ ಕಟ್ಟಿದರಲ್ಲಾ
ಇಂತಹ ಚರಿತೆ ಸಾಹಿತ್ಯ ಚರಿತೆಗೆ
ಮೀಸಲಾಯಿತಲ್ಲ
ಶತಶತಮಾನದಿ ಕನ್ನಡ ಜನಪದ
ಉಳಿದು ಬೆಳೆಯಿತಲ್ಲಾ
ಇಂದು ಸಂತೆಯಲಿ ಆಂಗ್ಲ ಮೋಹದಲಿ
ಕುಬ್ಜರಾದೆವಲ್ಲಾ
ಕೋಟಿ ಮಕ್ಕಳನು ಹಡೆದ ಕನ್ನಡತಿ
ಎಲ್ಲರ ಸಲುಹಿದಳಲ್ಲಾ
ಇಂತಹ ತಾಯಿಯ ಪೊರೆವ ಮಕ್ಕಳು
ಇಬ್ಬರೂ ಇಲ್ಲವಲ್ಲಾ!
*****
