ದಿನೆ ದಿನೆ ನಿನ್ನ ಕಾಣಲೆಂಬ
ನನ್ನ ಮನವು ತವಕಿಸುತ್ತಿದೆ
ನಿನ್ನ ಪಡೆಯದೆ ಇನ್ನೇನು ಅರ್ಥ
ಬದುಕು ಭವಸಾಗರವಾಗಿದೆ
ನಿ ಅನಂತ ಕೋಟಿ ಬ್ರಹ್ಮಾಂಡ ನಾಯಕ
ನಾನೋ ಎಲ್ಲೊ ಇರುವ ದೀನ ಜೀವಿ
ನೀನು ನನ್ನ ದನಿ ಆಲಿಸದೆ ಇರಲಾರೆ
ನಿನ್ನಲುಂಟು ನನ್ನ ಮೇಲೆತ್ತುವ ಠೀವಿ
ಜ್ಞಾನ ಅಜ್ಞಾನಗಳು ಬೇಡ ನನಗೆ
ಸಿರಿ ಬಡತನವೂ ಬೇಡ ದೊರೆ
ನಿನ್ನಲಿ ನಾನೇನು ಬೇಡಿದರೂ
ಸ್ವಾರ್ಥವೇ ವಿನಃ ಆಗದು ಮೊರೆ
ಮನಸ್ಸಿನಾಲೋಚನೆಯ ಕಣದಲ್ಲೂ
ನಿನ್ನ ಸ್ಮರಣೆಯೊಂದೇ ಕಾಡಿರಲಿ
ನೀ ನಿರದ ಯಾವ ಭಾಗ್ಯವೂ ನನಗೆ
ತೃಣ ಸಮಾನವೇ ಆಗಿರಲಿ
ಇನ್ನೂ ಕಾಡಬೇಡ ಓ ಗೋವಿಂದ
ತಾಳಲಾರೆ ಈ ವಿರಹ ಅಗ್ನಿ
ನಿನ್ನ ಪ್ರೀತಿಯಲಿ ಕರಗದೆ ನಾ
ಮಾಣಿಕ್ಯ ವಿಠಲನಲ್ಲದ ಭವಾಗ್ನಿ
*****
