ಸವಾಲೊಂದು ನಿನ್ನ ಮೇಲ್
ಶಾಹಿರ ಕೇಳ್ |ಪ|
ಬಯಲು ಅಲಾವಿಗೆ ನವಿಲು ಕುಣಿದು ನಿಂತು
ತೈಲವಿಲ್ಲದ ಜ್ಯೋತಿ ಬೆಳಕು ಮದೀನದಿ |೧|
ಆವಿ ಹೊಟ್ಟಿಯಲೊಂದು ಎಮ್ಮಿಕರವ ಹುಟ್ಟಿ
ಹಮ್ಮಿಲೆ ಹೈನ ಮಾಡಿತೋ ಮಕ್ಕಾಮದೀನದಿ |೨|
ಮಲದ ತೆಲಿಯಮ್ಯಾಲ ಇಲಿ ಹೋಗಿ ಕುಳತಿತ್ತು
ಸಲಗಿ ಹಚ್ಚಿದ ನರಿ ಹುಲಿಯಕೊಂದಿತು ಹಾರಿ |೩|
ಪಂಜರದೊಳಗಿನ ಹುಂಜ ಕಾಮಿಯ ನುಂಗಿ
ಪಿಂಜಾರಣ್ಣನ ಜ್ಯೋತಿ ಪಂಜಾಗಿ ಉರದಿತು |೪|
ಬಂಡಿಗಾಲಿಯೊಳು ಬೆಂಕಿಯ ಒತ್ತಿಟ್ಟು
ಪುಂಡ ಯಜೀದನ ಕುಂಡಿಯು ಸುಟ್ಟಿತು |೫|
ತಾಬೂತಿನೊಳಗೊಂದು ತಗಡಿನ್ಹಸ್ತವ ಕಂಡು
ಮಾಬೂಬೆ ಶಿಶುನಾಳಧೀಶಗ ನಗಿ ಬಂತು |೬|
*****