ಕಾಮನಬಿಲ್ಲು ಅಷ್ಟೂ ಬಣ್ಣಗಳನ್ನು ಚೆಲ್ಲಿತು
ನನಗೆ ನಾನೆ ಕೇಳಿಕೊಂಡೆ
ನಿನಗೆ ಯಾವ ಬಣ್ಣ ಇಷ್ಟ?
ಗೊರಟೆ, ಗುಲಾಬಿ, ಸೇವಂತಿಗೆ
ದಾಸವಾಳ, ಕನಕಾಂಬರ, ಮಲ್ಲಿಗೆ
ಹೆಣೆದು ನಿಂತವು
ಅನ್ನಿಸಿತು:
ಆಯ್ಕೆ ಬಹಳ ಕಷ್ಟ.
೨
ಹುಲಿ, ಕರಡಿ, ಆನೆ, ಅಳಿಲು?
ಜಿಂಕೆ, ಕೊಕ್ಕರೆ, ಕಾಜಾಣ, ನವಿಲು?
ನನಗೆ ನಾನೆ ಕೇಳಿಕೊಂಡೆ
ನಿನಗೆ ಯಾವುದು ಇಷ್ಟ?
ರೆಕ್ಕೆ, ಪುಕ್ಕ, ಕಿವಿ, ಕೊರಳು
ನಡಿಗೆ, ಉಡಿಗೆ, ಕೆನೆತ, ಕುಣಿತ
ಕಣ್ಣು ತುಂಬಿದವು
ಅನ್ನಿಸಿತು:
ಆಯ್ಕೆ ಬಹಳ ಕಷ್ಟ.
೩
ವ್ಯಂಗ್ಯ, ಕಟಕಿ, ಕೋಪ, ತಾಪ
ಮದ ಮತ್ಸರ, ದಾಹ, ದುಃಖ
ಕವಣೆ ಬೀಸಿದವು
ನನಗೆ ನಾನೇ ಕೇಳಿಕೊಂಡೆ
ನೀನು ಯಾವುದರಿಂದ ಮುಕ್ತ?
ಮದ್ದು ಗುಂಡು, ಫಿರಂಗಿ, ಕತ್ತಿಗಳು
ಪರಸ್ಪರ ಸೆಣೆಸಾಡಿದವು
ಅನ್ನಿಸಿತು ಆಯ್ಕೆ ಬಹಳ ಕಷ್ಟ.
೪
ಮುಗಿಲು ಮುಟ್ಟತ್ತಾ ಇತ್ತು ಒಂದು ಮರ
ಅದರಲ್ಲೊಂದು ಹಕ್ಕಿ-ಹಾಡು
ನೆಲಕ್ಕಂಟಿಕೊಂಡಿತ್ತು ಒಂದು ಪೊದೆ
ಅದರಲ್ಲೊಂದು ಇರವೆ-ಗೂಡು.
ಹುಲ್ಲುಕಡ್ಡಿಯನ್ನೂ ನೋಯಿಸಲಾರೆ
ಹಾಗಂದಿದ್ದನಲ್ಲವೆ ಬುದ್ಧ?
ಆ ಹುಲ್ಲು ಕಡ್ಡಿಗೆ
ತಲೆಬಾಗಿ ವಂದಿಸಿದೆ
ಮೆಲ್ಲಗೆ ತುಟಿ ಸೋಕಿಸಿ ಮುತ್ತು ಕೊಟ್ಟೆ.
*****
