ಜಗವುತಾನಿದು ರಂಗಭೂಮಿಯು ನರನು ಅದರೊಳು ವಿವಿಧ ಪಾತ್ರವ |
ವಹಿಸಿ ತನ್ನಯ ಕಾರ್ಯವೆಸಗುತೆ ಮರಳಿ ಪೋಗುವನು || ೧ ||
ಮೊದಲು ತಾನವ ಶಿಶುವು ರೂಪವಧರಿಸಿ ತನ್ನಯ ಕೇಳಿಯಿಂದಲಿ |
ತಣಿಪತನ್ನಯ ಜನನಿ ಜನಕರಮನವ ತಾನಾಗ || ೨ ||
ವರುಷವಾರೇಳುಗಳು ಗತಿಸಲು ಶಾಲೆಯೋದುವ ಬಾಲನೆನಿಸುತೆ |
ಸರುವಕಾಲದಿ ತುಂಟನೆನಿಪನು ಶಾಲೆಯೊಳು ಮನೆಯೊಳಗೆ || ೩ ||
ಓದುಮುಗಿಯಲು ಜಗದಿ ತನ್ನಯಸಮಾನಪಂಡಿತನಾವನೆನ್ನುತೆ |
ಮೇದು ಮೆರೆವಾಗೂಳಿಯಂದದಿ ಕೊಬ್ಬಿಮೆರೆಯುವನೂ || ೪ ||
ಸಂದಪ್ರಾಯದಿಕಾಲನಿಡೆ ತಾಸುಂದರಾಂಗಿಯ ಸಂಗಬಯುಸುತೆ |
ತಂದು ವೊಬ್ಬಳಮಾಳ್ಪತನ್ನಯ ಮನೆಯ ವೊಡತಕಿಯನೂ || ೫ ||
ಗಂಡ ಹೆಂಡಿರ ಸಂಗಫಲದಿಂ ಸುಂದರಾಂಗನು ಸುತನು ಜನಿಸಲು|
ತಂದೆತನವನು ಪಡೆದು ಜಗದೊಳು ಸಂದುಮೆರೆಯುವನೂ || ೬ ||
ಸಂದಪ್ರಾಯವು ಗತಿಸಲಾಗ ಮುಪ್ಪುತಾ ತಲೆದೋರುತಿರೆ ತಾ |
ಹೊಂದಿ ಸುಖದುಃಖಗಳ ಅನುಭವಹಿರಿಯನೆನಿಸುವನು || ೭ ||
ಮಂದಿ ಮಕ್ಕಳ ನಡುವೆ ತಿರುಗುತೆ ಚಂದವಾಗಿಹ ಬುದ್ಧಿ ಪೇಳ್ವನು |
ಕುಂದುವನು ಮನದೊಳಗೆ ಹಿಂದಿನಪ್ರಾಯನೆಯುತಲಿ || ೮ ||
ಮುಪ್ಪುಬರಲವ ಬೆದರಿನಂದದಿ ರಕ್ತಮಾಂಸಾದಿಗಳ ವಿರಹಿತ |
ಕಪ್ಪುಬಡೆದ ಚಿಪ್ಪು ಮುದ್ರೆಯ ಮುಖದಿ ತೋರುವನೂ || ೯ ||
ಕಿವುಡು ಕಿವಿಯಿಂ ಕುರುಡುಕಣ್ಣಿಂಬಚ್ಚಬಾಯಿಂ ಬೋಳುತಲೆಯಿಂ |
ನಡುವುಬಾಗಿಲಿ ಕಲಿಯ ಕಾಲದ ಹನುಮನೆಂತವದೋರುವಂ || ೧೦ ||
ಆದೊಡಂ ತಾನ್ಹರಿಯ ಸ್ಮರಿಸದೆ ಸತಿಸುತರ ದುಡ್ಡಿನ ಸ್ಮರಣೆಗೈಯುತೆ |
ಕಾದುಕೊಂಡಿದ ಮರಣ ಮರೆಯುತೆ ಮೌಖ್ಯದಲಿ ಮುಳಗುವನು || ೧೧ ||
ಪ್ರಾಣವಕ್ಕಿಯು ಹಾರಲವ ತಾ ಶೂನ್ಯನಾಗುತೆ ಪಂಚಭೂತದಿ |
ಕೂಡಿ ಮಣ್ಣೊಳು ಮಣ್ಣುಆಗುತಲಳಿದು ಹೋಗುವನೂ || ೧೨ ||
*****
