ನಾನೇ ಇರುವೆ ನನ್ನ ಪರವಾಗಿ
ಪಾರ್ಲಿಮೆಂಟಿನಲ್ಲಿ ವಿ-
ಧಾನ ಸೌಧದಲ್ಲಿ
ನಾನೆ ಆಗಿಹೆ ನನ್ನ ವಿರೋಧಿ
ಇರುವುದ ಬಾಚುವಲಿ
ದೇಶವ ತೊಳೆಯುವಲಿ
ಗಾಂಧಿ ಇಷ್ಟ ತತ್ವವೂ ಇಷ್ಟ
ಎಲ್ಲ ಕಂಠಪಾಠ
ಮೈಕು ಹಿಡಿದರೆ ಬರಿ ಚಪ್ಪಾಳೆ
ಇದೇ ನಿತ್ಯದಾಟ
ಅಲ್ಲವೇ ಹೇಳಿ ನಾನೆ ಸಮರ್ಥ
ಪ್ರಜಾಪ್ರಭುತ್ವದ ಪ್ರತಿನಿಧಿ
ನಂಬುವ ನೀವು ಇರುವ ತನಕ
ಭಾರತ ನನಗೆ ತವನಿಧಿ
ಬದಲಾವಣೆಗೆ ಬೇಕು ಚುನಾವಣೆ
ತಾಕತ್ತಿದ್ದರೆ ಸ್ಪರ್ಧಿಸಿರಿ
ನನ್ನದೋ ಹಲ ಸಾವಿರ ಕೋಟಿ
ಮೈಗಾವಲಿಗೆ ಧರ್ಮಸಿರಿ
ಜಾತಿ ಉಳಿಯಲಿ ಜಾತಿಯೆ ಜಗತ್ತು
ಮಠಮಾನ್ಯಗಳೆ ಕೋಟೆಗಳು
ಇಲ್ಲಿದೆ ನನ್ನ ರಹಸ್ಯ ಬೇರು
ಭೇದಿಸೆ ನಿಮಗೆ ಸವಾಲುಗಳು
ಎಲ್ಲೆಡೆ ಬಿತ್ತುವೆ ನನ್ನಯ ಹೆಸರನು
ನಿಮ್ಮಯ ಬೆವರಿನಲಿ
ಇಂತಹ ನನ್ನನು ಕೊಂಡಾಡಿರುವಿರಿ
ಚರಿತೆಯ ಪುಟಗಳಲಿ
ಇಂತಹ ಚರಿತೆಗೂ ಇಂದಿನ ಕತೆಗೂ
ಎಲ್ಲಿದೆ ವ್ಯತ್ಯಾಸ
ಸುವರ್ಣಾಕ್ಷರದೆ ಬರೆಸುವೆ ಇದನು
ಇನ್ನು ಕ್ರಾಂತಿಗೆ ಸನ್ಯಾಸ
*****
