ಗದುಗಿನ ನಾಡಹಬ್ಬದಲ್ಲಿ ಶ್ರೀ `ಮಧುರ ಚೆನ್ನ’ ರಿಂದ ಪರೀಕ್ಷಿಸಲ್ಲಟ್ಟ ರಜತಪದಕವನ್ನು ಪಡೆದುದು
ಅಮ್ಮಾ, ಚಿತ್ರದ ಆಂಗಡಿ ನೋಡೆ!
ಸುಂದರ ಸೊಬಗಿನ ಅಂಗಡಿ ನೋಡೆ!
ಬಗೆ ಬಗೆ ಬಣ್ಣದ ಪಟಗಳ ನೋಡೆ!
ಭಾರತದೇಶದ ಚಿತ್ರ ನೋಡೆ! ||೧||
ಅಮ್ಮಾ, ಇಲ್ಲಿದೆ ಹೆಚ್ಚಿನ ಚಿತ್ರ!
ಸಕಲರ ಮನವನು ಸೆಳೆಯುವ ಚಿತ್ರ!
ಇದುವೇ ನಾ ಹಟ ಮಾಡಿದ ಚಿತ್ರ!
ಕನ್ನಡ ಕುವರರ ಹೆಮ್ಮೆಯ ಚಿತ್ರ! ||೨||
ಸುಂದರ ಬನಗಳ ಚಿತ್ರಿಪ ಚಿತ್ರ!
ಗುಡ್ಡ ಬೆಟ್ಟಗಳು ತುಂಬಿಹ ಚಿತ್ರ!
ಗೋದಾವರಿ ಹೊಳೆ ಹರಿದಿಹ ಚಿತ್ರ!
ಕಾವೇರಿಯು ತಾ ಕಾಣುವ ಚಿತ್ರ! ||೩||
ಅಮ್ಮಾ, ಇಲ್ಲಿಹ ಗುಡಿಗಳ ನೋಡು!
ಜಕ್ಕಣ ಶಿಲ್ಪಿಯ ಜಾಣ್ಮೆಯ ನೋಡು!
ವಿಜಯನಗರದಾ ವೈಭವ ನೋಡು!
ಹುಕ್ಕ ಬುಕ್ಳ ಮಾಧವರನು ನೋಡು! ||೪||
ಅಮ್ಮಾ ಕುಮಾರವ್ಯಾಸನ ಚಿತ್ರ!
ಕಲ್ಯಾಣದ ಆ ಬಸವನ ಚಿತ್ರ!
ಚೆನ್ನಮ್ಮನ ಕಿತ್ತೂರಿನ ಚಿತ್ರ!
ಬೆಳವಡಿ ರಾಣಿಯ ಶೌರ್ಯದ ಚಿತ್ರ! ||೫||
ಅಮ್ಮಾ, ಇದದೋ ಹಳ್ಳಿಯ ಚಿತ್ರ!
ನೇಗಿಲ ಹೊಡೆಯುವ ಯೋಗಿಯ ಚಿತ್ರ!
ರಾಟಿಯ ತಿರುಗಿಪ ಭಗಿನಿಯ ಚಿತ್ರ!
ಖಾದಿಯ ಕೊಳ್ಳುವ ಜನಗಳ ಚಿತ್ರ! ||೬||
ಅಮಮಾ! ಭೀಕರ ದೃಶ್ಯವಿದಲ್ಲೆ?
ಬಡವನ ಗೋಳಿನ ಚಿತ್ರವಿದಲ್ಲೆ?
ಹೊಲೆಯರೆಂದು ಸಲೆ ಹಳಿಯುವರಲ್ಲೆ?
ದಾಸ್ಯದ ದಾಹದಿ ಬಳಲುವರಲ್ಲೆ? ||೭||
ಅಮ್ಮಾ, ಇಲ್ಲಿಹ ನೋಟವಿದೇನು?
ಕನ್ನಡದಮ್ಮನು ಅಳುತಿಹಳೇನು?
ಕರುನಾಡಿನ ಜನ ಮಲಗಿಹುದೇನು?
ಪರನಾಡಿನ ಜನ ಬರುತಿಹುದೇನು? ||೮||
ಅಮ್ಮಾ, ಬೇಕಿದು ಚಿತ್ರವು ನೋಡು!
ಅಯ್ಯೋ! ಮರಾಠ ಬಂದನು ನೋಡು!
ತೆಲುಗನು ಬಂದನು ಕೊಳ್ವನು ನೋಡು!
ಅಪ್ಪನ ಹುಡುಕುವ ಬೇಗನೆ ಓಡು ||೯||
ಅಪ್ಪಾ! ಅಪ್ಪಾ!! ಎಲ್ಲಿಹೆ ಬಾರೋ!
ಪ್ರೀತಿಯ ಚಿತ್ರವ ಕೊಳ್ವರು ಬಾರೋ!!
ಕರ್ನಾಟಕವಿದು ಪೋಪುದು ಬಾರೋ!!!
ಕನ್ನಡಿಗನೆ ನೀ ಬೇಗನೆ ಬಾರೋ!!!! ||೧ಂ||
*****
