(ನನ್ನ ಗೆಳೆಯನೋರ್ವನಿಗೆ ಗಂಡುಮಗು ಹುಟ್ಟಿತೆಂಬ ವಾರ್ತೆ ಕೇಳಿದಾಗ ಬರೆದು ಕಳಿಸಿದುದು.)
೧
ಗಂಡು ಜನಿಸಿತೇನು ಗೆಳೆಯ,
ಗಂಡು ಗಂಡಸಾಗಲಿ!
ಹಾಲು, ಹಣ್ಣು ಕದ್ದುತಿಂದು
ಪುಂಡ ಹುಡುಗನಾಗಲಿ !
೨
ಶಾಲೆಗವನ ಅಟ್ಟಿ, ಬಿಟ್ಟ,
ಮನೆಯ ಪಾಠ ಕಲಿಯಲಿ!
ಲತ್ತಿ ಪಟ್ಟು ಹಾಕಿಬಿಟ್ಟ,
ಹುಲಿಯಹೊಡೆವನಾಗಲಿ!
೩
ಕಲ್ಲುಪೂಜೆ ಕಲಿಸಿಬಿಟ್ಟ
ದೇವರಿಲ್ಲವೆಂದುಹೇಳು!
“ಇರುವನಲ್ಲ” ವೆನ್ನಲವನು,
ಸತ್ತ ದೇವರೆಂದು ಹೇಳು!
೪
ಹಳೆಯಧರ್ಮ ಹೇಳಿಬಿಟ್ಟ,
ಧರ್ಮಲಂಡನಾಗಲಿ!
ತಲೆಗೆ ತಡೆಯಗಟ್ಟಿಬಿಟ್ಟ,
ಬುದ್ಧಿಶಕ್ತಿ ಬೆಳೆಯಲಿ!
೫
ಮದುವೆಗಿದುವೆ ಮಾಡಿಬಿಟ್ಟ,
ಅವನೆ ಮಾಡಿಕೊಳ್ಳಲಿ!
ಚಿನ್ನ-ಬೆಳ್ಳಿ ಗಳಿಸಿಬಿಟ್ಟ,
ತಾನೆ ಹೊಟ್ಟೆ ಹೊರೆಯಲಿ !
*****
