ಸ್ವಾತಿಯ ಮಳೆ

ಸ್ವಾತಿಯ ಮಳೆ ಹನಿ
ಹನಿಯಾಗಿ ನಾನು|
ಮುತ್ತಾಗಬಯಸುವೆನು
ನಿನ್ನೆದೆಯ ಪ್ರೀತಿಕಡಲಾಳದಲ್ಲಿ|
ಹ್ಞೂ ಅನ್ನು ಉಹ್ಞೂ ಅನ್ನು
ನಾ ಬಂದಿರುವುದೆ ನಿನಗಾಗಿ
ನಿನ್ನ ಹೃದಯದ ಬಾಗಿಲು
ತೆರೆಯುವುದೆ ನನಗಾಗಿ||

ಅದೆಷ್ಟೋ ದಿನ ಕಾದಿರುವೆ ನಿನಗಾಗಿ
ಈ ಶುಭ ಮಹೂರ್ತಕ್ಕಾಗಿ|
ಬಂದಿದೆ ಶುಭಘಳಿಗೆ
ನಿನ್ನೊಲವಲಿ ಕರಗಿ ನೀರಾಗಿ
ಇಳೆಯಾಗಿ ಇಳಿಯುತಿರುವೆ|
ನೀನಿರುವೆ ನನ್ನೊಳಗೆ
ಬಂದು ಸೇರುವೆನು ನಿನ್ನೊಳಗೆ||

ಚಂದ್ರಮಗೆ ಚಕೋರಿ ಕಾಯುವಂತೆ
ಮುಂಗಾರಿಗೆ ಮಯೂರ ಹಾತೊರೆಯುವಂತೆ|
ಕಾದು ಕಂಪಿಸುತಿರುವೆ ನಾ ನಿನಗೆ
ನಮ್ಮಿಬ್ಬರ ಪ್ರೇಮ ಸಮಾಗಮಕೆ|
ಅದು ಆಗಲಿಂದೇ ಎಂದು ಕೈ ಚಾಚಿ
ಅಭಿಮುಖಳಾಗೆನ್ನ ಅಭಿಸಾರಿಕೆ||

ಉದಯಿಸಲಿ ಪ್ರೇಮ ಯುಗ
ಮೇಳೈಸಲಿ ಹೊಸರಾಗ ಸಂಯೋಗ|
ನಾಂದಿ ಹಾಡಲಿ ನವಯುಗ
ಆತ್ಮ ಸಮ್ಮಿಲನ ಮಾಡೋಣ, ಈ
ಜನ್ಮ ಸದುಪಯೋಗ ಪಡೆಯೋಣ||
*****