೧
ಮೊದಲು ಮುಂಜಾನೆಯದು ಮುಗುಳು ನಗು ನಗುತ,
ಬಳಿಕ ಮಧ್ಯಾಹ್ನವದು ಬಿರುಸು ನಗೆಯುಗುತ,
ಕಡೆಗೆ ಸಂಜೆಯ ಸಮಯ ಸೌಮ್ಯವಾಗುತ್ತ,
ಕತ್ತಲೆಯ ಕಾಲಿಮೆಯೆ ಪರಿಣಾಮವು
೨
ಮರದ ರೆಂಬೆಗಳಲ್ಲಿ ಮೊಗ್ಗೆ ಮೊದಲೊಗೆದು,
ಸರಿಯಾದ ಸಮಯಕ್ಕೆ ಸುಮವಾಗಿ ಬಿರಿದು,
ದಿವಸದವಸಾನದಲ್ಲಿ ತೊಟ್ಟಿಂದ ಸಿಡಿದು,
ಜೀವನವ ನೀಗುವುದೆ ಪರಿಣಾಮವು
೩
ಸೂರ್ಯನಾರಲು ತಾರೆ ಮಸಕು ಮಿನುಗುತ್ತ,
ರಾತ್ರಿಯಾಗಲು ತೊಳಗಿ ಬೆಳಗುವುದು ಸುತ್ತ.
ಮುಂಜಾವ ಬರಲಂಜಿ ಹಿಂಜರುಯುತೆತ್ತ
ನಾಮಾವಶೇಷವದು ಪರಿಣಾಮವು
೪
ಅನತಿದೂರದಿ ತೆರೆಯು ಸಾಗರದೊಳೆದ್ದು,
ಮುಂದುವರಿಯುತ ಬಂದು ಘೋಷದಿಂದಿದ್ದು,
ದಡವನಡಹಾಯ್ದಲ್ಲಿ ಮೌನದಲ್ಲಿ ಮುಗಿದು
ನೊರೆಯಾಗಿ ಮರೆಯುವುದೆ ಪರಿಣಾಮವು
೫
ಆರಂಭದಲಿ ಬಾಲ್ಯ ಕಾಲವರಳುವುದು,
ಆ ಮೇಲೆ ಯೌವನದ ಗಾಂಭೀರ್ಯವಿಹುದು,
ಕಡೆಗೆ ಮುದುರುವ ಮುದಿಯತನವು ಮಸಗುವುದು,
ಬಾಳು ಬರಿದಾಗವುದೆ ಪರಿಣಾಮವು
*****
೧೯೩೭
