ಪಕ್ಕದ ಸೀಟಿನಾಕೆ

ತಾನೊಂದು ರಂಭೆ ಅಂದುಕೊಂಡಂತಿದೆ
ನನ್ನ ಪಕ್ಕದ ಸೀಟಿನಾಕೆ
ಪಾರ್ಲರ್ ದಿಂದ ನೇರ ವಿಮಾನಕ್ಕೇರಿದ
ಮೂವತ್ತರ ಬೆಡಗಿ
ಥೇಟ್ ಐಟಮ್ ಸಾಂಗ್ ಗರ್ಲ್
ಗುಲಾಬಿ ಬಣ್ಣ ತಲೆತುಂಬ ಹುಚ್ಚೆದ್ದ ಕೂದಲು
ಉದ್ದನೆಯ ಉಗುರು ಮೇಲೆ ಕಪ್ಪುಬಣ್ಣ
ಕೂತಲ್ಲಿ ಕೂರಲಾರೆ ನಿಂತಲ್ಲಿ ನಿಲ್ಲಲಾರೆ
ಪರಿಚಯಿಸಿಕೊಂಡು
ಗಹಗಹಿಸಿ ನಕ್ಕು ವಿಮಾನದೊಳಗೂ
ಗಾಗಲ್ ಏರಿಸಿ ಓಡಾಟ;
ತಾಸಿಗೊಮ್ಮೊಮ್ಮೆ ಕಪ್ಪು ಟೀ
ಉದ್ದನೆಯ ಸಿಗಾರ್ ಬಣ್ಣ ಬಣ್ಣಗಳ ಡ್ರಿಂಕ್ಸ್
ಅರ್ಧ ತಾಸಿಗೊಮ್ಮೊಮ್ಮೆ ಗಲ್ಲಕೆ
ರೋಜು ರೂಹು ಲಿಪ್ಸ್ಟಿಕ್ ಮೇಲೆ ಲಿಪ್ಸ್ಟಿಕ್
ಎದ್ದು ಸುತ್ತಾಟಕೆ ಹೊರಟರೆ
ಸೀಟು ತುಂಬೆಲ್ಲಾ ಪಾರ್ಲರ್ ಚಿಲ್ಲಾಪಿಲ್ಲಿ.

ಪೈಲೆಟ್ ಮೈಮುಟ್ಟಿ ಕೈಹಿಸುಕಿ
ಏನೇನೋ ಹೇಳುತ್ತಾನೆ
ಇವಳ ಗಹಗಹಿಕೆಯ ನಗು ಬುಲ್ಡೋಜರ್
ಗಗನ ಸಖಿಯರು ಹೊಗಳಿರಬಹುದು ರೂಪ
ಮೈಯೆಲ್ಲಾ ಥಳಕಾಟ ತುಳುಕಾಟ
ಪಯಣಿಗರಿಗೆ ಬಿಸಿಬಿಸಿ ತುಪ್ಪ
ಸುಟ್ಟ ಮುಖ ಬಿರಿಬಿರಿ ನೋಟ.

ಸಿಗಾರ್ ಗೊಗ್ಗುಕೆಮ್ಮು ಕುಡಿತವಾಸನೆ
ಮಾತುಮಾತಿಗೆ ಸಾರಿ ಎಕ್ಸಕ್ಯೂಜ್
ಕಿಟಕಿ ತೆರೆಯದೆ ನೆಮ್ಮದಿಯಾಗಿ ಉಸಿರಾಡದೆ
ನಾನು ಒಳಗೊಳಗೇ ಒದ್ದಾಡಿ ಸುಮ್ಮನೆ

ಪಾರದರ್ಶಕ ಉಡುಪಿನೊಳಗೆ
ಬಿರಿದ ತೊಡೆ ಎದೆ ತೋಳು
ಮಾಗಿ ಚಳಿ ಬಡಿದ ಪಯಣಿಗರು
ವಿಸ್ಕಿಗೂ ಬೆಚ್ಚಗಾಗದೆ
ಸುಮ್ಮನೆ ವಿಮಾನದೊಳಗೆ ಸುತ್ತಾಟ
ನೋಡಿದ್ದೇ ಈಕೆಯನ್ನು ಹೆಜ್ಜೆ ನಿಧಾನ

‘ನಶೆ ಏರಿ ನಿದ್ರಿಸಿದ ರಂಭಾ-ಅಬ್ಬಾ’
ಸಖಿಯ ಸಹಾಯ ಕೋರಿ
ಮೈ ಕೈ ಮುಚ್ಚಿ ಲೈಟ್ ಆಫ್ ಮಾಡಿದೆ
ಸುತ್ತಾಡುವವು ಎಲ್ಲೋ ಮಾಯ.

ಆರೆಂಟು ತಾಸಿನ ಪಯಣ
ನೋಡಿದ್ದೇ ನೋಡಿದ್ದು ಆಕೆಯ ಡೌಲು
ತಪ್ಪಿಸಿಕೊಂಡೆ ಕಿಡಕಿಯಾಚೆಯ ಚೆಲುವ

ಕ್ಷಣಗಣನೆ ಪ್ಯಾರಿಸ್ಸಿಗೆ ಇಳಿಯಲು
ಭರಾಟೆಯ ಮೇಕಪ್ಪು ಘಾಟಿ ಸುವಾಸನೆ
ಸಾಕಪ್ಪಾ ಸಾಕಾಗಿತ್ತು ಕಿರಿಕಿರಿಯ ಸಹವಾಸ
ಬರ್ರನೆ ಮುಂಗೈ ಎಳೆದು ಮುದ್ದುಕೊಟ್ಟು ನಡೆದಳು
ಮೆಲ್ಲನೆ ಕೇಳಿದೆ ಸಖಿಗೆ, ಯಾರಿವಳು?
ಫ್ರೆಂಚ್ ಮಾಡೆಲ್ “ಪ್ರಾನ್ಸಿ ಜಾಕೋಬ್”
*****