ಕಾಡಾನೆ ಕಾಡಯ್ಯ, ಬ್ಯಾಡರ ಬೀಡಯ್ಯ
ನಾಡಾಗಿ ಮಾಡಿ ಮಲ್ಲಣ್ಣ, ಕಿತ್ತೂರ
ಗೂಡೀಗೆ ಗುಡಿಯ ನೇರಿಸಿದೊ ೧
ಬಣಜೀಗ ಮಲ್ಲಣ್ಣ, ಜನದಾಗ ಕಣಿಯಾದ
ಕುಣಿಸಿ ಲಕ್ಕಸಮಿ ನಾಡಾಗ | ಕಿತ್ತೂರ
ಕಣಜಾತು ಮುತ್ತು ಮಾಣಿಕದ ೨
ಕಿತ್ತೂರ ಕಡೆಯರಸು, ಮುತ್ತು ಮಾಣಿಕದೊಡೆಯ
ದತ್ತಕಽ ಮಗಽ ಮಲಸಜ್ಜೊ | ಸಮಸೂರ
ಸತ್ತ ಕಿತ್ತೂರ ಮುಟ್ಟುದಕೊ ೩
ಹಾಲಗುಂಬಳ ಬಳ್ಳಿ, ಹಾದೀಗೆ ಹಬ್ಬ್ಯಾವ
ಹಾರೂರಿಗೆ ಬಂತೊ ದೌವಲತ್ತೊ | ಕಿತ್ತೂರ
ಮಲಸರ್ಜ್ಗ ಬಂತೊ ವನದೇಶೋ ೪
ಸೊಗಲಂಬು ಊರಿಲ್ಲ, ಸಮುದರಕ ನೆಲೆಯಿಲ್ಲ
ಜ್ಯಾತ ಮುತ್ತಿಽಗೆ ಬೆಲೆಯಿಲ್ಲ | ಕಿತ್ತೂರ
ಮಲಸರ್ಜನಂಥ ದೊರೆಯಿಲ್ಲ ೫
ರಂಗ ಕಿತ್ತೂರ ಮಾಲ, ಹೊಕ್ಕು ನೋಡುಣ ಬಾರ
ಮಾಲ ಮಾಲೆಲ್ಲ ಕನ್ನಡಿ | ಮಲಸರ್ಜ
ಮಾಲ ಕಟ್ಟಿಸಿ ಇರಲಿಲ್ಲೊ ೬
ಕಿತ್ತೂರ ನೀಮಾಲ, ಮತ್ತ್ಯಾರ ಕಟ್ಟಿಸ್ಯಾರ
ಮಕ್ಕಳ ತಂದಿ ಮಲಸರ್ಜ | ನಿಮ್ಮಾಲ
ಹೊಕ್ಕ ನೋಡ್ಯಾರ ಹೊಲಿಯಾರ ೭
ಕಿತ್ತೂರ ಮಲಸಜ್ಜ, ಕಿಚ್ಚ ಕಂಜವನಲ್ಲ
ದತ್ತಗೇಡೊಬ್ಬ ಮಗ ಹುಟ್ಟಿ | ಕಳೆದಾನೊ
ಹತ್ತ ತಲಿಗಂಡ ವತನಾವ ೮
ಕಿತ್ತೂರ ಮಲಸಜ್ಜ, ಯಾರಿಗಂಜವನಲ್ಲ
ಪಚ್ಛೇದ ಕಣ್ಣ ತಿರವೂತ | ಮಲಸರ್ಜ
ತಕೊಂಡೆನೆಂದ ಹುದಲಿಽಯ ೯
ಶಿವಲಿಂಗ ರುದ್ರನಿಗೆ, ಸಾವುಕೂಡಲೆ ಬಂತು
ಜೀವ ಕಸವೀಸಿ ಚೆನ್ನವ್ವಗೊ | ಹಾರೂರು
ಹಾವಾಗಿ ಮನೆಗೆ ವಿಷ ಬಿಟ್ಟೊ ೧೦
ಮಡದೇರಿಬ್ಬರು, ಸಿಡಿದು ಕಡದಾಡಿ ಒಡಕ್ಹುಟ್ಟಿ
ತಡಮಾಡ್ದೆ ದತ್ತಕ ತಗೊಂಡು | ಚೆನ್ನಮ್ಮ
ಒಡತ್ಯಾಗಿ ನಾಡ ಆಳ್ಯಾಳೊ ೧೧
ಹಾಲಿನಂಥ ಕಿತ್ತೂರ್ಗೆ, ಹನ್ನೆರಡು ಕೀಲಗಸಿ
ಸುತ್ತ ಸುತ್ತೆಲ್ಲ ಕಿರಿಜಿಡ್ಡಿ | ಈರಪನ
ಕಿತ್ತೂರಿಗೆ ತಂದು ಇಳುವ್ಯಾರೊ ೧೨
ಕಂದವ್ನ ಹಡಿಲಿಲ್ಲ, ಕೈ ಬೀಸಿ ನಡೆಲಿಲ್ಲ
ಗಂಡನ ಪುಣ್ಯ ಉಣಲಿಲ್ಲ | ಈರವ್ವ
ರಂಡಿತನ ನಿನಗ ಮೂಲಾತೊ ೧೩
ಕನ್ನೂರ ಮಲ್ಲಗ, ತನ್ನಿ ಬ್ಯಾನ್ಹತ್ತಲಿ
ಚೆನ್ನಮನ ರಾಜ್ಯ ನುಂಗಾಕೊ | ಥಾಕರೆಗ
ಗುನ್ನೆ ಮಾಡುದಕ ಪುಸಲಿಟ್ಟೊ ೧೪
ಕಲ್ಲೂರ ಮಲ್ಲಗ, ಎಲ್ಲಾರು ಒಡೆಯಽಲಿ
ಗುಲ್ಲಾಗಂಟೇರು ಉಗಳಽಲಿ | ಥಾಕರೆಗೆ
ಸಲ್ಲಾ ಕೊಟ್ಟಾನೊ ಮುತ್ತಾಕೊ ೧೫
ಧಾರ್ವಾಡ ವೆಂಕಾಟಿ, ದಾರೆಳಿಲೆ ಸಿರಕೊಯ್ದ
ಕಾರಭಾರಿಗಳು ಕಿವಿಗೊಟ್ಟು | ಕಿತ್ತೂರು
ಚೂರು ಚೂರಾತೊ ಕದನಾತೊ ೧೬
ಕಿತ್ತೂರ ಚೆನ್ನಮ್ಮ, ಸುತ್ತೂರ ಒಡತ್ಯಾಗಿ
ಕತ್ತಿ ಕವಚಗಳ ಉಡವುಟ್ಟೊ | ಅಬ್ಬರದಿ
ಬತ್ತಲಗುದರೀಯ ಜಿಗದೇರೊ ೧೭
ಗಂಡನ್ನ ಕಳಕೊಂಡು, ಬೆಂಡಾದ ಚೆನ್ನಮ್ಮ
ಗಂಡಾಗಿ ರಣಕ ಇಳಿದಾಳೊ | ನಾಡನ್ನ
ವುಂಡ ಬಂಡಾಯ ಹಿಂಡಾಕೊ ೧೮
ಧಾರವಾಡದ ದಂಡು, ವಾರ್ಯಾಗ ಬರುತಿರಲು
ಏರೀಯ ಹತ್ತಿ ಸುರಿಸ್ಯಾರೊ | ಕಿತ್ತೂರ
ವೀರರೊಗೆದಾರೊ ಗುಂಡೀರೊ ೧೯
ಕೆಂಪು ಮೋರೆಯ ದಂಡು, ಚಿಂಪಾಗಿ ಸಿಡದೀತೊ
ರಂಪರಂಪೆಂದು ಓಡೀತೊ ಅಮಟೂರ
ಬಾಳು ಗುಂಡಿಟ್ಟೊ ಥಾಕರೆಗೊ ೨೦
ಮುಚ್ಚಿನ ಕಾಳಗಕ, ಮೆಚ್ಚ್ಯಾಳೊ ಚೆನ್ನಮ್ಮ
ಉಚ್ಚಿ ಬೆಳ್ಳಿಗಳ ಕೊಡತಾಳೊ | ಬಂಟರಿಗೆ
ಹೆಚ್ಚಿನ ರೋಜ ಬರೆಸ್ಯಾಳೊ ೨೧
ಬೆಳಗಾವಿ ಚಿಪ್ಲಿನ್ನ, ಒಳ ಹಾದಿಲೆ ದಂಡೆತ್ತಿ
ಬೆಳಗಾಗಿ ದಂಡು ಬೀಡಿಟ್ಟೊ | ಕಿತ್ತೂರು
ತಳಮಳ ನೋಡೊ ಚಣದಾಗೊ ೨೨
ಹೊನ್ನು ಹಣಗಳನೀವೆ, ಮನ್ನೂಣಿ ನಿನಗೀವೆ
ಬೇಡಿದ್ದ ನೀವೆ ಗೋವಿಂದ | ಮನಸಿಟ್ಟು
ಮದ್ದಿಽಗೆ ಎಣ್ಣೆ ನೀ ಬೆರಿಸೊ ೨೩
ಲದ್ದೀಯ ಗೋವಿಂದ, ಕುದ್ದಲಗೇಡ್ಹಾರೂವ
ಮದ್ದಿಽಗೆ ಲದ್ದಿ ಬೆರಿಸ್ಯಾನೊ | ನಸಿಬಾವೊ
ಬಿದ್ದು ಕಿತ್ತೂರು ಹಾಳಾತೊ ೨೪
ಕನ್ನೂರ ಕಲ್ಲೂರ, ಮಲ್ಲರದು ಪಿತೂರಿ
ರಾಗಿ ಕೂಡಿಸಿದ ಹುಸಿ ಮದ್ದೊ | ಕಿತ್ತೂರ
ನಸಿಬ ಹಾರ್ಯಾವೊ ಹುಸಿ ಗುಂಡೊ ೨೫
ಕಿತ್ತೂರ ಕಿಲ್ಲೇಕ, ಉತ್ತಿ ಕರ್ಯಾರಿಲ್ಲ
ಉಕ್ಕಿಽನ ಗುಂಡು ಬಿಗಿವಾಗ | ಚೆನ್ನಮ್ನ
ಹಕ್ಕ್ಯಾಗಿ ಬಾಯ ಬಿಡತಾಳ ೨೬
ಕಿತ್ತೂರ ಕಿಲ್ಲೇಕ, ಏನೇನ ಮಸಲತ್ತ
ಉಕ್ಕಿಽನ ಗುಂಡ ಉರಿಬಾಣ | ಚೆನ್ನಮ್ಮ
ಅರಮನಿಗೆ ಬಾಣ ಬಿಡತಾರೊ ೨೭
ಜಮಖಂಡಿ ದೇಸಾಯಿ, ಯಮಕೀಲೆ ಕೂಡಿಽದ
ಸಮಯಕ ಚಿಪ್ಲಿನ್ನ ದಂಡಿಽಗೊ | ಕಿತ್ತೂರ
ಸಮನಾಗೈಸೀರಿ ಹೊತ್ತೊಯ್ದೊ ೨೮
ಎಂಥಾದ ಕಿತ್ತೂರು, ಚಿಂತ್ಯಾಗ ಬೆಳಗಾತ
ಕೆಂಪು ಮೋತೆವರು ಒಲಿಹೂಡಿ | ಚೆನ್ನವ್ನ
ಚಿತ್ರದ ಮೂಲ ಮುರಿದಾರೊ ೨೯
ಕಿತ್ತೂರ ಕಿಲ್ಲೇಕ, ಹತ್ತು ಕಾಲ್ನಚ್ಚಣಕಿ
ಕೊತ್ತ ಕೊತ್ತಲಕ ಕೈವಂಜು | ಹಿಡಕೊಂಡು
ಸುತ್ತ ಚೆನ್ನವ್ನ ಹುಡಿಕ್ಯಾರೊ ೩೦
ಕಿತ್ತೂರ ಶರಸೂರಿ, ಮತ್ತೇನ ಹೇಳಲಿ
ಚಿತ್ತರದ ಗೊಂಬಿ ಅಳತಾವ | ಚೆನ್ನವಗ
ಹಿಂಡೆಮ್ಮಿ ಹಸವು ಎಳಿಗಾರ ೩೧
ಕೆರಳಿಽದ ಕೇಸರಣಿ, ಕಿತ್ತೂರ ಬಿಟಿಗೊಟ್ಟು
ಬತ್ತಲಗುದರೀಯ ಜಿಗದೇರಿ | ಹೊಂಗಲದ
ಗಡಿಯಾಗ್ಬೈರೀಗೆ ಸೆರೆಯಾಗಿ ೩೨
ಕಿತ್ತೂರ ಶರಸೂರಿ, ಮತ್ತೇನ ಹೇಳಽಲಿ
ಎತ್ತೊಂಟಿ ಮ್ಯಾಗ ಸದಲ್ಹೇರಿ | ಹೊಡೆದಾರೊ
ಮತ್ತ ಧಾರ್ವಾಡ ಕಿಲ್ಲೇಕೊ ೩೩
ಅತ್ತೆ ಸೊಸ್ತೆರ ತಂದು, ಮತ್ತ ಹೊಂಗಲದಾಗ
ಸುತ್ತ ಕಾವಲಿಯೊ ಹಗಲಿರುಳೊ | ಜನದಾಗ
ಎತ್ತ ನೋಡಿದರೂ ತಳಮಳೊ ೩೪
ಮುಕ್ಕಣ್ಣ ಗತಿಯೆಂದು, ಸಿಕ್ಕು ಸೆರೆಯಾಗಿದ್ದು
ಬಿಕ್ಕಿ ಅಳತಾಳೊ -ಈರವ್ಹೊ | ರಾಯಣ್ಣ
ಅಸ ನಿಮ್ಮುಪ್ಪು ಈ ರಾಯೊ ೩೫
ಗೆದ್ದು ಕಿತ್ತೂರ ತಂದು, ಉದ್ದ ಬೀಳುವೆ ತಾಯಿ
ಕದ್ದ ಮಾತಲ್ಲ ನಿಮ್ಮಾಣಿ | ಇಲದಿರಕ
ಬಿದ್ದ ಹೋಗೂವೆ ರಣದಾಗೊ ೩೬
ಸಂಗೊಳ್ಳಿ ರಾಯಣ್ಣ, ಹಂಗ್ಹರಿದ ದಳವಾಯಿ
ದಂಗೆ ಎಬ್ಬಿಸಿದ ನಾಡಾಗೊ | ಕಿತ್ತೂರ
ಕಂಗೆಟ್ಟ ಜನರು ಕೂಡ್ಯಾರೊ ೩೭
ಸುದ್ದಿ ಹಬ್ಬಿತು ಸುತ್ತ, ಎದ್ದು ಕೂಡಿತು ಮಂದಿ
ಗದ್ದಲಕ ಅಂಜಿ ಸರಕಾರ | ಈರವ್ನ
ಕದ್ದಿಲ ಕೊಂದಾರೊ ವಿಷ ಕೊಟ್ಟೊ ೩೮
ಬೆಳ್ಳಿ ಹರಿವಾಣದಾಗ, ಬಿಳಿ ಮುತ್ತು ಸುರಿದ್ಹಾಂಗ
ಚಂದ್ರಸಾಲಿಗೋಡಿ ಬಿರಿಯಾಲಿ | ಈರವ್ನ
ಕೊಂದವರ ವಂಶ ಹುರಿಯಾಲಿ ೩೯
ಖದಾನ ಪುರದಾಗ ಹೋದಾನೊ ರಾಯಣ್ಣ
ಭೇದವಿಡಲಿಲ್ಲ ಮನದಾಗ | ಲಿಂಗೊಂಡ
ವಾದಿ ರಾಯಣ್ಣ ಮೋಸಾಗಿ ೪೦
ನಂದಗಡ ಊರಾಗ, ಮಂದ್ಯಾಗ ರಾಯಣ್ಣ
ತಂದು ಶೂಲಕ ಹಾಕ್ಯಾರೊ | ಕಿತ್ತೂರ
ಗೊಂದಲ ಶೂರಗ ದುದಿಮರಣೊ ೪೧
ಹೊಂಗಲದ ಮಟದಾಗ, ಲಿಂಗ ಪೂಜೆಯ ಮಾಡಿ
ಭಂಗಾಗುದೆಂದು ಎದೆಗುಂದಿ | ಚೆನ್ನವ್ವ
ಉಂಗರ್ವಜ್ಜಿಽರ ನುಂಗ್ಯಾಳೊ ೪೨
*****
