ಕೂಲಿಕೆಲಸ ನಮ್ಮದು

ಕೂಲಿಕೆಲಸ ನಮ್ಮದು
ದಿನದ ಕೂಲಿಕೆಲಸ ನಮ್ಮದು|
ಅಂದಿನದ ಕೂಲಿ ಅಂದೇ ಪಡೆವ
ನಾಳಿನ ಕೆಲಸದ ಖಾತ್ರಿಯೇ ಇಲ್ಲ||

ದಿನದ ಕರ್ಮಕೆ ಪ್ರತಿಫಲವ
ಅಂದೇ ಕೊಡುವಕಾಲ|
ಹಿಂದಿನಂತೆ ಮುಂದಿನ ಜನ್ಮಕೆ
ವರ್ಗಾವಣೆಯೆಂಬುದೇ ಇಲ್ಲ|
ಪುಣ್ಯವಿದ್ದರೇನೇ ನಾಳೆಯ
ಕೆಲಸ ನೀ ಪಡೆಯುವೆ
ಇಲ್ಲದಿರೆ ಇಂದೇ
ಕಂತೆ ಒಗೆದು ಸಂತೆಮುಗಿಸಿ
ಇಹದ ಪ್ರಯಾಣ ಮುಗಿಸುವೆ||

ಕೋಟಿ ಇರಲಿ ಆಸ್ತಿ
ನಿನ್ನದಲ್ಲ ನಾಳೆಗೆ|
ಭೀತಿ ಇರಲಿ ನಿನಗೆ
ನಾಳೆಯ ಪಾಳಿಗೆ|
ಭಯವಿರಲಿ ಧರ್ಮದ
ಮಾನದಂಡ ಚಾಟಿಗೆ|
ನೀತಿ ನಿಯಮವಿರಲಿ
ನಿನ್ನ ದುಡಿಮೆಗೆ||

ಎಷ್ಟು ಗಳಿಸಿ ಕೂಡಿಟ್ಟರೇನು
ಹೆತ್ತಮಕ್ಕಳು ಕಡೆಗಣಿಸೆ ಮುಪ್ಪಿನಲಿ
ನೊಂದು ಮನಮಿಡಿಯೆ
ಯಾರಿರುವರು ನಿನ್ನೊಟ್ಟಿಗೆ|
ಸತ್ತಾಗ ಬಂಧು-ಸಂಸಾರ
ಬರುವುದೇ ನಿನ್ನೊಂದಿಗೆ
ಧರ್ಮ, ಪುಣ್ಯಕರ್ಮ ಫಲಗಳೆರಡೇ
ಉಳಿವವು ನಿನ್ನ ಜೊತೆಗೆ||
*****