ಗಾಳಿಪಟ

ಏರುವ ಎತ್ತರಕೆ ಬಾನೆ ಗುರಿ
ಹಾರುವ ಬಯಕೆಗೆ ದಾರ ಮಿತಿ!

ಭಾರ ಹೇರಿ ತೂಗುವ
ನೂರೆಂಟು ಬಾಲಂಗೋಚಿಗಳು
ನುಗ್ಗುವ ಉತ್ಸಾಹಕೆ
ಎದುರಾಗುವ ಆಳೆತ್ತರ ಗೋಡೆಗಳು!

ಗುರುತ್ವಾಕರ್ಷಣೆಯ ಎದೆಗೊದ್ದು
ಅಟ್ಟಹಾಸದಿ ಮೇಲೇರಿ ಹಾರಿ
ಮೆರೆವ ಬಯಕೆಗೆ
ಅಡ್ಡಿ ಸೂತ್ರಧಾರಿ
ಕೆಲಸಕ್ಕೆ ಬಾರದ ವ್ಯರ್ಥ
ಪ್ರಯತ್ನಗಳು ಯಾವ ಕೆಲಸಕ್ಕೆ?
ಮೈ ಮರೆತರೆ ಮೊಟ್ಟುವ, ಮೆಟ್ಟುವ
ನಾಜೂಕು ನೂಲು
ಎಲ್ಲೆ ಮೀರುವ ಬಯಕೆಯ ಸೋಲು
ಸೂತ್ರ ಕಿತ್ತೊಗೆದು
ವಿಸ್ತಾರ ದಿಗಂತ ತಬ್ಬುವ ತುಡಿತ
ಮನಃಪಟಲದಲಿ ರೆಕ್ಕೆ ಕಳಚಿ
ಬೋಡಾದ ಮಳೆಹುಳು
ನೆಲವನಪ್ಪಿ ವಿಲವಿಲನೆ
ಒದ್ದಾಡುವ ಚಿತ್ರ

ಮಿತಿಮೀರುವ
ಮಿತಿಮೀರಲಾಗದ
ತುಮುಲಗಳ ಗೊಂದಲ
ಏನೊಂದೂ ನಿರ್ಧರಿಸಲಾಗದೇ
ಮನ ಚಂಚಲ
ಪುಟಿದೇಳುವ ಉತ್ಸಾಹ
ಕೆಳದಬ್ಬಿ ತುಳಿವ ರಾಕ್ಷಸೀ
ಕ್ರೌರ್ಯದ ಮಧ್ಯೆ
ಅಡ್ಡಗಾಲಿಡುವ ಲಕ್ಷ್ಮಣರೇಖೆ
ದ್ವಂದ್ವದಲಿ ಸಿಕ್ಕು ಸದಾ ತ್ರಿಶಂಕು ಸ್ವರ್ಗ!

ಏರುವ ಎತ್ತರಕೆ ಬಾನೆ ಗುರಿ
ಹಾರುವ ಬಯಕೆಗೆ ದಾರ ಮಿತಿ!
*****