ಓ ಟರಕ-ಹರಕ
ಮನೆ ಮುರಕ.
ಜಿದ್ದು
ಹದ್ದನೊಪ್ಪದ ಹದ್ದು!
ಇತಿಯ ಮಿತಿ ಮೀರಿದ್ದು.
ಹೆಣದ ಊಟ.
ಕಾಟ ಏರಾಟ, ಮಾಟ
ದಿಗಿಲು-ಭುಗಿಲು
ಸೇರುವದು ವಿಷಕಾರುವದು
ಕಾರಿದುದನೇ ನೆಕ್ಕಿ
ಬಿಕ್ಕಿ ಅಳುವದು
ಕರುಣೆ-ದಯೆ-ಧರ್ಮ-
ಇಲ್ಲವಲಾ ಎಂದು ಮೊರೆಯುವದು!
ಅಜ್ಞಾನಹಂಕಾರ ತೆಕ್ಕಿ-ಮುಕ್ಕಿ
ಬಾಳೆಲ್ಲ ಬಡಿದಾಟ.
ಮರಣ ಮುಕ್ತಿ.
ನಿನ್ನೆ-ಇಂದು-ನಾಳೆ
ಒಂದೆ ಸಿದ್ಧಿ.
ಸ್ಥಲ ಕಾಲ ಪಲ್ಲಟಸಿ
ಹೆಸರ ತಿದ್ದಿ.
ವರ್ತಮಾನವು ಎಂದು ಭೂತ ಭೌತದ ಸುದ್ದಿ
ಶೂನ್ಯಾಂತ-ಸಿದ್ಧಾಂತ-ವೇದಾಂತ
ಕೊರಳ ಗುದ್ದಿ.
ಅದು-ಅಭಾವ.
‘ನಮಗೆಲ್ಲರಿಗು ಒಬ್ಬನೇ ತಂದೆ-‘ ಅವನೇ ದೇವರೆಂದೆ!
ಅಣ್ಣ ತಮ್ಮರ ಬದುಕಿಗಾಗಿ ಕೊಂದೆ.
ನ್ಯಾಯ ಹೂಡಿಯೆ ಮುಂದೆ ಅನ್ಯಾಯ ತಂದೆ
ಅವರದಿವರದು ತಂದು-ನಾನೆ ತಿಂದೆ
ಹಿಂದೆ ಇಲ್ಲದ ಟರಕಗೇನು ಮುಂದೆ?
ಆ ಸಮಾಜು ಈ ಸಮಾಜು
ಕಡಿದಾಡಿ ಬಡಿದಾಡಿ ಹೊಡಿ ಸಲಾಮು.
ಆಗು ಬಾಜೂ
ಗಾಯಕ್ಕಪಾಯಕ್ಕೆ ಇದೆ ಮಲಾಮು.
ತಲೆ ಕೆಡಿಸಿಕೊಳ್ಳದಿರು,
ತಲೆಯ ಹಾಕಿ.
ಅಲ್ಲಿ ಇಲ್ಲ ಬಾಕಿ
ಹುಚ್ಚಲಾ! ಬಿಚ್ಚಲಾ
ಎದೆ ಕವಡುಗಂಟು
ಜೀವ ಜೀವಕ್ಕುಂಟು
ಬಾಳ-ನಂಟು.
*****
