Home / ಕವನ / ಕವಿತೆ / ವಾಸ್ತು ಗಿಡ

ವಾಸ್ತು ಗಿಡ

೧
ಅವರ ಬಂಗಲೆಯ ಹಜಾರದ
ನೀರ ಬೋಗುಣಿಯಲಿ ನೆಟ್ಟ
ಅಲ್ಲಲ್ಲ… ಇಟ್ಟ
ಅದು ವಾಸ್ತು ಗಿಡವಂತೆ.
ನಿಂತಿದೆ ತಾನೇ,
ದಯನೀಯವಾಗಿ.
ಅದರ ಮೊಗದ ತುಂಬಾ ದುಗುಡ
ಈಗಲೋ ಆಗಲೋ
ಕಟ್ಟೆ ಒಡೆವಂತೆ.

ದಿಕ್ಕೆಟ್ಟು ನಿಂತ
ಜೀವಂತ ಗಿಡವೂ
ಒಂದು ಬೆದರುಬೊಂಬೆ!
ಅವರ ಷೋಕೇಸಿನ
ನಿರ್ಗಂಧ ಪ್ಲಾಸ್ಟಿಕ್‌ ಹೂವು
ನಿಸ್ತೇಜ ಫಲಕಗಳ ಜೊತೆಗೆ.

‘ಈ ಗಿಡಕ್ಕೆ
ಮಣ್ಣು ಬೇಡ
ಬಿಸಿಲೂ ಬೇಡ
ಗೊಬ್ಬರವೂ ಹಾಕಬೇಕಿಲ್ಲ
ಕಳೆಯೂ ಬೆಳೆಯುವುದಿಲ್ಲ
ಕೊಳೆಯುವುದೂ ಇಲ್ಲ.
ಪಾತಿ ಮಾಡಬೇಕಿಲ್ಲ.
ಮಣ್ಣು ಹದ ಮಾಡುವಂತಿಲ್ಲ
ಕ್ರಿಮಿ ಕೀಟದ ಸೊಂಕಿಲ್ಲ
ಇರುತ್ತದೆ ಇದ್ದಂತೆ ಹೀಗೇ……
ಅಂಟಿಯೂ ಅಂಟದಂತೆ
ಆದರೂ ಮನೆಗೇ ಅದೃಷ್ಟ’

ಅವರ ಹೆಮ್ಮೆಯ ವ್ಯಾಖ್ಯಾನ.

೨

ಅಲ್ಲಿ ಇದ್ದಷ್ಟೂ ಹೊತ್ತು
ವಾಸ್ತುಗಿಡದ ನಿಟ್ಟುಸಿರು
ಬಿಗಿದು ಕಟ್ಟಿತ್ತು ನನ್ನುಸಿರು.

ವಾಪಸ್ಸು ಹೊರಟವಳಿಗೆ
ಅವರಿಂದ ಅದೇ ಗಿಡದ
ಒಂದು ಟಿಸಿಲು ಉಡುಗೊರೆ

‘ನೀರಲ್ಲಿ ಬಿಸಾಕಿದರೂ ಸಾಕು
ಬೇರೇನೂ ಬೇಕಿಲ್ಲ
ಅನಾಯಾಸ ಅದೃಷ್ಟ’

‘ಇದ್ದಂತೆಯೇ ಇರಲು!’

ನನ್ನ ಪಿಸುಗು
ಅವರ ತಲುಪಲೇಯಿಲ್ಲ.

ಹೊರಗೆ ಬಂದದ್ದೇ
ಬಟ್ಟಂಬಯಲಿನಲಿ
ಮಣ್ಣು ಕೆತ್ತಿ ಪಾತಿ ಮಾಡಿ
ಬೇರನೂರಿ ಗಿಡನೆಟ್ಟೆ
ನಾನೇ ಮಣ್ಣಿನಲಿ
ಊರಿಕೊಂಡಂತೆ.

ಕ್ಷಣಾರ್ಧದಲ್ಲಿ
ಜಡ ಗಿಡಕ್ಕೆ ಜೀವ ಮೂಡಿ
ನೂರಾರು ಕೊಂಬೆ
ಸಾವಿರಾರು ಎಲೆ ಚಿಗುರೊಡೆದು…

ನಗು
ಈಗಷ್ಟೇ…
ವಾಸ್ತು ಅಳೆಯಲು ಹೊರಟಿದೆ!
*****

Tagged:

Leave a Reply

Your email address will not be published. Required fields are marked *

ಒಂದೇ ರೂಮಿನಲ್ಲಿದ್ದರೂ ಅವನನ್ನು ನನ್ನ ಸ್ನೇಹಿತ ಎಂದು ಮನಸ್ಸು ಒಪ್ಪಿಕೊಂಡಿರಲಿಲ್ಲ. ರಾತ್ರಿ ನಿದ್ದೆಗಾಗಿ ಮಾತ್ರ ಅವನಿಗದೊಂದು ರೂಮು. ಊಟತಿಂಡಿ ಎಲ್ಲಾ ಹೋಟೆಲ್ಲು. ನಾನು ಸಂಜೆ ಏಳಕ್ಕೆ ರೂಮಿಗೆ ಬಂದರೆ ಅವನು ಹತ್ತಕ್ಕೆ ಬರುತ್ತಿದ್ದ. ಬೆಳಿಗ್ಗೆ ಅವನು ಹತ್ತಕ್ಕೆ ಹೊರಟರೆ ನಾನು ಒಂದ...

ಚಾಮುಂಡಿ, ದುರ್ಗಿ, ಕಾಳಿ, ಶಂಕರಿ, ಮಾರಿ ಮೊದಲಾದ ದೇವಿಗಳಿಗೂ : ಆಂಜನೇಯ, ವಲ್ಲಭರಾಯ, ನರಸಿಂಹ ಮೊದಲಾದ ದೇವರುಗಳಿಗೂ ನಮ್ಮೂರಲ್ಲಿ ಏನೂ ಕೊರತೆಯಿಲ್ಲ. ಇಲ್ಲೊಂದು ಶಂಕರಿ ದೇವಾಲಯ ಬಹುಕಾಲದಿಂದಲೂ ಇದೆ. ಅದನ್ನು ಕಟ್ಟಿಸಿದವರು ಯಾರೆಂಬುದೇ ಗೊತ್ತಿಲ್ಲ. ಪ್ರತಿ ಶನಿವಾರ ಅಭಿಷೇಕ, ಶುಕ್ರ...

ರಾಜ ನಿಮಗೆ ಗೊತ್ತೆ? ಇಲ್ಲ? ಆತ ನನ್ನ ಸ್ನೇಹಿತ, ಆಪ್ತ ಸ್ನೇಹಿತ. ಅವನಿಗೂ ಕತೆ ಬರೆಯುವ ಹುಚ್ಚಿದೆ. ಆದರೆ ಬರೆದು ಸಂಪಾದಿಸಿ ಬದುಕುವ ಹಟವಿಲ್ಲ. ಹಾಗೆಂದೇ, ತಕ್ಕಮಟ್ಟಿಗೆ ಸಂಪಾದನೆ ಇರುವ ಬೇರೆ ಉದ್ಯೋಗದಲ್ಲಿದ್ದಾನೆ! ರಾಜ ಬರೆದಿರುವ ಒಂದು ಕಥೆ ನನ್ನಲ್ಲಿದೆ. ಓದಿ ನೋಡುತ್ತೀರಾ? ನಿಮ...

ಅಂದು ನಾನು, ನಮ್ಮ ತಾತ, ನನ್ನ ತಂಗಿ ಎಲ್ಲರೂ ಕಣದಲ್ಲಿ ಕುಳಿತುಕೊಂಡು ಹರಟೆ ಹೊಡೆಯುತ್ತಿದ್ದೆವು. ಸುಗ್ಗಿಯ ಕಾಲವಾದ್ದರಿಂದ ರೈತರು ಮತ್ತು ಆಳುಗಳು ಕಣದಲ್ಲಿ ಕೆಲಸ ಮಾಡುತ್ತಿದ್ದರು. ನಮ್ಮ ತಾತನು ಆ ಮಾತು ಈ ಮಾತು ಆಡುತ್ತಿದ್ದರೂ, ಆತನ ಒಂದು ಕಣ್ಣು ಮಾತ್ರ ಕೆಲಸಗಾರರ ಮೇಲೆಯೇ ಇರುತ್...

ರಾಜಗೃಹದ ಬಳಿಯ ಗೃಧ್ರಕೂಟ ಪರ್ವತ. ಪರಮಾತ್ಮನಾದ ಬುದ್ಧದೇವನ ಪವಿತ್ರ ಪಾದಧೂಳಿಯಿಂದ ಪುನೀತವಾದ ಗಿರಿವರದ ನೆತ್ತಿ. ನೆತ್ತಿಯ ನೆಲೆಯಲ್ಲಿ ಎರಡು ಗುಹೆಗಳು. ಅಲ್ಲಿ ಇಬ್ಬರು ಬೌದ್ಧ ಸನ್ಯಾಸಿಗಳು ಧ್ಯಾನಶೀಲಾನುಷ್ಠಾನಾದಿಗಳಿಂದ ನಿರ್‍ವಾಣವನ್ನು ಸಾಧಿಸುತ್ತಿದ್ದರು. ಇಬ್ಬರೂ ಅಕ್ಕ ಪಕ್ಕದ ...

ವ್ಹಾಲೆಂಟಾಯಿನ್ ಡಿಗ್ಬಿಯು ಭೋಜನವನ್ನು ತೀರಿಸಿಕೊಂಡು ‘ಹಾವಾನಾ ಸಿಗರ’ (ತಂಬಾಕದ ಸುರುಳೆ) ಸೇದುತ್ತೆ ತನ್ನ ಆರಾಮ ಕುರ್ಚಿಯಲ್ಲಿ ಯಥಾಸುಖವಾಗಿ ಕುಳಿತು ಏನೇನೋ ವಿಚಾರ ಮಾಡುತ್ತಿದ್ದನು. ಸುಗಂಧಿತವಾದ ಸಿಗರದ ಹೊಗೆಯು ಕಾಮಿನಿಯ ಕೇಶಕಲಾಪದಂತೆ ಸುರುಳೆ ಸುರುಳೆಯಾಗಿ ಅಂತರಿಕ್ಷದಲ್ಲಿ ಗಾಳ...