ಏಕೆ ಗೆಳತಿ ವಿರಹವೇದನೆಯ
ಸಹಿಸಲಾಗದೆ ತೊಳಲಾಡುತಿರುವೆ|
ಸಣ್ಣ ಸಣ್ಣ ವಿಷಯಗಳಿಗೇಕೆ
ನೀನೇ ಗಂಡನ ಮನೆಯ ತೊರೆದು
ಮನೆ ಮನಗಳ ಅಸಮಧಾನಕೆ ಎಡೆಮಾಡುವೆ|
ನಾನು ಸರಿಸಮನಾಗೆ ದುಡಿವೆ ಎಂಬ
ಹಮ್ಮಿನಿಂದೇಕೆ ನಿನ್ನ ಜೀವನ ಬರಡಾಗಿಸುವೆ||
ನಾನು ಸರಿಸಮನಾಗಿ ದುಡಿವೆ
ಎಂಬ ಹೆಮ್ಮೆ ಇರಲಿ,
ಸಂಸಾರ ನಡೆಸೆ ಸಹಾಯವಾಗುವೆನೆಂಬ
ಅಭಿಮಾನವಿರಲಿ|
ಬೇಡ ನಿನಗೆ ನಾನೇ, ನನ್ನಿಂದಲೇ
ಎಂಬ ಕುರುಡು ಹಮ್ಮಿನ ಸ್ವಭಾವ
ಬೆಳೆಸಿಕೊ ಎಲ್ಲರೂ ಸುಖಸಂಸಾರಕೆ
ಸಮಾನರೆಂಬ ಸತ್ಯಭಾವ||
ಇರುವುದು ನೀನಿಲ್ಲಿ ತರವಲ್ಲ ಎಂದು
ನಿನ್ನತ್ತಿಗೆ ಹೇಳುವುದೇ ಸರಿ ಇದೆ|
ಅಲ್ಲಿ ಗಂಡನೊಂದಿಗೆ ಹೊಂದಿ
ಬಾಳುವುದೇ ತರವು||
ಅಲ್ಲಿ ನೀನೇ ರಾಣಿ ನಿನ್ನದೇ ಅರಮನೆ
ಇದು ನಿನ್ನ ಪ್ರೀತಿಯ ತವರುಮನೆ
ಬಂದು ಹೋಗಲದುವಷ್ಟೇ ಚೆಂದ|
ಅಲ್ಲಿದೆ ನಿನ್ನ ಸ್ವಂತಿಕೆ
ಇಲ್ಲಿ ಸಿಗುವುದು ಅತಿಥಿ ಸತ್ಕಾರಿಕೆ||
ಹೊರಡು ತಡಮಾಡದೆ
ವಿಷಘಳಿಗೆ ಸಮೀಪಿಸುವ ಮುನ್ನ|
ನಿನ್ನ ವಿರಹವ ಸಹಿಸದೆ
ಪರಿತಪಿಸುತಿದೆ ಅಲ್ಲಿ ನಿನ್ನದೇ ಜೀವ|
ಕಣ್ಣಲೇ ಕ್ಷಮೆಯಾಚಿಸಿ ಪ್ರೀತಿಸೆ
ಕಾಯುತಿದೆ ನಿನ್ನ ಬಾಳದೈವ||
*****
