ದೀಪದಿಂದ ದೀಪ ಹಚ್ಚು
ಬೆಳಗಲಿ ಬಾಳದೀವಿಗೆ
ಕಳೆದು ತಿಮಿರ ಬೆಳಕು ಬರಲಿ
ನಿತ್ಯ ನಮ್ಮ ಬಾಳಿಗೆ ||
ದೈವನಿತ್ತ ಪ್ರಕೃತಿ ನಮಗೆ
ಅದುವೆ ನಮಗೆ ತಾಯಿಯು
ಜೀವವುಳಿಸಿ ಬಾಳು ಕೊಡುವ
ಅದಕೆ ನಮಿಸು ನಿತ್ಯವು ||
ಸೂರ್ಯ ಚಂದ್ರ ತಾರಾಗಣವು
ನೋಡಲೆಷ್ಟು ಸುಂದರ
ಬೆಟ್ಟ ಗುಡ್ಡ ನದಿಯು ಜಲಧಿ
ದೇವ ಕೊಟ್ಟ ಸಿರಿವರ ||
ಮಳೆಯು ಇರಲಿ ಚಳಿಯು ಇರಲಿ
ಬಿಸಿಲು, ಗಾಳಿ ಬೀಸಲಿ
ಹದದ ಬಾಳೆ ಮುದವ ಕೊಡುವ
ಇವೆಲ್ಲವಿರಲಿ ಜೊತೆಯಲಿ ||
ಉಲಿವ ಹಕ್ಕಿ ಬೆಳಗೂ ಚುಕ್ಕಿ
ಬೆಳದಿಂಗಳ ಮೋದವು
ಎಂಥ ಚೆಲುವು ಎಂಥ ಮುದವು
ಎಂಥಹ ಸೌಂದರ್ಯವು ||
ಬೊಚ್ಚು ಬಾಯಿ ಹಾಲುಗಲ್ಲ
ಮಗುವ ನಗುವು ಸುಂದರ
ತರುವ ತಬ್ಬಿ ಬೆಳೆವ ಲತೆಗೆ
ಒಡಲೆಲ್ಲೆಡೆ ಕಾತುರ ||
ಇಷ್ಟು ಕೊಡುಗೆ ನೀಡಿದ
ಆ ದೈವ ನಮಗೆ ಅಗೋಚರ
ಭಕ್ತಿ ಭಾವದಿಂದ ಅವನ
ಭಜಿಸಿ ನಮಿಸೆ ಗೋಚರ ||
*****
