ರಾಗ ಧನ್ಯಾಸಿ- ಆದಿ ತಾಳ
ನಂಬಲೆಂತು ನಾ ನೋಡುವ ಮುನ್ನ
ಯದುಕುಲದಾ ಲೀಲೆಯ ನಿನ್ನ? ||ಪಲ್ಲ||
ನೋಡದೆ ನಂಬಲು ಬಲ್ಲವನಲ್ಲ,
ನೋಡಿಸಿ ನಂಬಿಸೊ ಬಲ್ಲವ ನಲ್ಲ! ||ಅನು||
೧ನನ್ನ ಮನದ ಮೋಹಮೇಕೆ ಹೀರೆ?
೨ಏಕೆದೆಯಾನೆಯ ಮದ ಮುರಿಯೆ?
೩ಏಕೆ ಕನಲ ಕುದುರೆಯ ಕೊಲಲೇರೆ?
೪ಬಿಗಿತದ ಕತ್ತೆಯ ತಿರ್ರನೆ ತರಿಯೆ? ||೧||
೫ಎದೆಯ ಬೆದೆಯ ಹಿಳಿಲನೇಕೆ ಹಿಳಿಯೆ ?
೬ಕಪಟದೇಕೆ ರೆಕ್ಕೆಯ ಕೀಳೆ?
೭ಹಗೆಯ ಹಾವಿನೇತಕೆ ಹೆಡೆ ತುಳಿಯೆ?
೮ಸೆಳೆಯಾಸೆಯ ಸುಳಿಯನೇಕೆ ಸೀಳೆ? ||೨||
ನಿನ್ನಡಿ ಹಂಬಲ ಹಸವ ಮೇಸೆಯ?
ಕೊಳಲಾಗದೆ ಬಿದಿರೆದೆಯೆನ್ನ?
೯ಆಲ ಸಾಲದೇನೆನ್ನೆದೆಯಾಸೆಯ ?
೧೦ಎತ್ತೆ ಏಕೆ ಪಾಪದ ಮಲೆಯನ್ನ? ||೩||
ಡಂಬ ಭಕ್ತಿಯೆನ್ನೆದೆಯಿಂ ಮಾಣದೆ,
೧೧ಮಘವನ್ಮಖ ಮಾಣಿಸಿ ಗುಣವೇಂ?
ನನ್ನ ನಯನದಿ ಸದಾ ನಿನನಾನದೆ,
೧೨ಯಮುನೆಯ ತೇಲಿನ ನೆಳಲಲಿ ತಣಿವೇಂ? ||೪||
೧೩ಹೂವಿನಾಸೆಯೇ? ಪ್ರೇಮದ ಮೊಗಸನೆ
ಸೂಸಿ ಹೂವಿಸೇಕೆದೆಯೆನ್ನ?
೧೪ನನ್ನೆದೆಯೊಗೆಯದೆ ಪಾತಕಿಯಗಸನೆ?
೧೫ಬಾಗಿಹೆ, ನೆಟ್ಟನೆ ನೆಗಹೇಕೆನ್ನ? ||೫||
ನನ್ನೆದೆಯಾನ್ಮೆಯ ೧೬ಮಲ್ಲನ ಮುರಿಯದೆ,
೧೭ಹರಿಯದೆದೆಯ ಹಿಂಸೆಯ ಬಿಲ್ಲ,
ಪಾಪಪುರುಷ ಕಂಸನಿರವನಿರಿಯದೆ,
ಬಲ್ಲೆನೆ ಬಿಲ್ಲಿನ ಹಬ್ಬದ ಗೆಲ್ಲ? ||೬||
ಗೊಲ್ಲ ಗೊಲ್ಲತಿಯರಲ್ಲಿಯೆ ಸಾಕೆನೆ
ಸಲ್ಲಿಸಿದೆಯೊ ೧೮ಮಲ್ಲಣಿಯೆಲ್ಲ?
ಹೊಲ್ಲ ಹೊಲ್ಲದಲಿ ತಲ್ಲಣಿಪೇಕೆನ
ಗೂಲ್ಲೆ ಮೆಲ್ಲಡಿಯ ಪಲ್ಲನದೊಲ್ಲ? ||೭||
ಆದೆಯ ರಾಧೆಯ ಹೃದಯಾರಾಧನ?
ಈಯೆಯೇಕೆ ನಿನ್ನಡಿ ಸಾರೆ?
ಕಂಬನಿಯಿಂಬಿಗನೆಂಬುದೆ ಸಾಧನ-
ಅಂಗಲಾಚಿ ಕರೆವೆನೇಕೆ ಬಾರೆ? ||೮||
ನನ್ನೆದೆ ಯದುಕುಲದಲಿ ಕಂಬನಿಯಾ
ಕೂಲದಿ ಬಾಲಲೀಲೆಯ ನಿನ್ನ
ಮರಳಿ ಮೆರಸದಿರೆ, ಕನಸಿನ ಗನಿಯಾ
ಕಾಲನನಗೆಯಲಳನವೆ ಅಕಟೆನ್ನ? ||೯||
*****
೧ ಪೂತನಿ
೨ ಕುವಲಯಾನಪೀಡನೆಂಬ ಆನೆ
೩ ಕೇತಿ ಎಂಬ ಕುದುರೆ
೪ ಧೇನುಕನೆಂಬ ಕತ್ತೆ
೫ ಅರಿಷ್ಟನೆಂಬ ಗೂಳಿ
೬ ಬಕಾಸುರ
೭ ಕಾಲಿಯನೆಂಬ ನಾಗ
೮ ತೃಣಾವರ್ತ
೯ ಭಾಂಡೀರವೆಂಬ ಆಲದ ಮರ
೧೦ ಗೋವರ್ಧನೋದ್ಧಾರ
೧೧ ಇಂದ್ರಯಜ್ಞ ನಿಷೇಧ
೧೨ ಆಕ್ರೂರನಿಗೆ ಯಮುನಾ ನದಿಯಲ್ಲಿತ್ತ ದರ್ಶನ
೧೩ ಮಾಲಾಕಾರನಿಂದ ಹೂವನ್ನು ಕೊಂಡುದು
೧೪ ಮಥುರೆಯಲ್ಲಿ ಅಗಸನನ್ನು ಎದುರ್ಗೊಂಡುದು
೧೫ ಕುಬ್ಜೆ
೧೬ ಜಾಣೂರ
೧೭ ಧನುರ್ಭಂಗ
೧೮ ರಾಸಕ್ರೀಡೆ
