ದೇಹವೆಂಬ ಹಣತೆಯಲ್ಲಿ

ದೇಹವೆಂಬ ಹಣತೆಯಲ್ಲಿ
ಎಣ್ಣೆ ಎಂಬ ಚೇತನದಲಿ
ಬತ್ತಿ ಎಂಬ ಭಕ್ತಿ ಇಟ್ಟು
ದೀಪ ಹಚ್ಚಿರಿ ನೀವು ದೀಪ ಹಚ್ಚಿರಿ ||

ಸತ್ಯ ಧರ್ಮ ಬೆಳಕಿಗಾಗಿ
ನಿತ್ಯ ಶಾಂತಿ ತೃಪ್ತಿಗಾಗಿ
ಬಾಳ ಬದುಕು, ಸುಗಮಕ್ಕಾಗಿ
ದೀಪ ಹಚ್ಚಿರಿ ನೀವು ದೀಪ ಹಚ್ಚಿರಿ ||

ಹಲವು ಮೌಢ್ಯ ಸಂಪ್ರದಾಯ
ಭೂತ ಪ್ರೇತ ಮಂತ್ರ ಮಾಟ
ತೊರೆದು ವಿದ್ಯೆ ಕಲಿಕೆಗಾಗಿ
ದೀಪ ಹಚ್ಚಿರಿ ನೀವು ದೀಪ ಹಚ್ಚಿರಿ ||

ಸತ್ಯ ಧರ್ಮ ಬೆಳಗುವಂಥ
ನ್ಯಾಯ ನೀತಿ ನೀಡುವಂಥ
ಮನುಜ ಬಾಳ್ವೆ ನಡೆಸುವಂಥ
ದೀಪ ಹಚ್ಚಿರಿ ನೀವು ದೀಪ ಹಚ್ಚಿರಿ ||

ಪ್ರೀತಿ ಪ್ರೇಮ ಸ್ನೇಹ ಬೆಸೆವ
ಎಲ್ಲರೊಂದಿಗೆ ಬಾಳುವಂಥ
ಸುಜನರಾಗಿ ಬಾಳುವಂಥ
ದೀಪ ಹಚ್ಚಿರಿ ನೀವು ದೀಪ ಹಚ್ಚಿರಿ ||
*****