ಕಿರುನಗೆ ಹೂನಗೆ ಮುಗುಳುನಗೆ
ಕನ್ನೆಯರ ಕೆನ್ನೆಗುಳಿ ನಗೆ
ಪುಟ್ಟ ಮಕ್ಕಳ ಕಚಗುಳಿಯ ನಗೆ
ಸ್ವಾಗತ ನಿಮಗೆ
ನೀವೆಲ್ಲಿ ಹೋದಿರಿ ಇಷ್ಟರ ವರೆಗೆ
ಕಡೆಗಣ್ಣನಗೆ ತುಟಿಯಂಚಿನ ನಗೆ
ಮುಗ್ಧನಗೆ ಹೊಟ್ಟೆತುಂಬುವ ಶುದ್ಧನಗೆ
ನೀವೆಲ್ಲಿ ಹೋದಿರಿ ಇಷ್ಟರ ವರೆಗೆ
ದುಃಖಿಸುವ ಮುಖಗಳಲಿ ಮರೆಯಾಗಿದ್ದಿರ
ದುರಿತ ಸಂಕಷ್ಟಗಳಲಿ ಜರಿದುಹೋಗಿದ್ದಿರ
ಅವಮಾನಗಳ ಕೆಳಗೆ ಕುಸಿದಿದ್ದಿರ
ಗರ್ವಿಷ್ಟರ ಭೀತಿಯಲಿ ಅಡಗಿಕುಳಿತಿದ್ದಿರ
ಮೂಡುವ ಬೆಳಗಿಗೆ ಜತೆಯಾಗಿದ್ದಿರ
ಬಿರಿಯುವ ಹೂಗಳಲಿ ಬೆರೆತಿದ್ದಿರ
ತಿಳಿಗೊಳದ ತೆರೆಗಳಲಿ ತೇಲುತಿದ್ದಿರ
ಕಿರುಗಾಳಿಯ ಒಳ ಸಿಕ್ಕಿ ಸುಳಿಯುತ್ತಿದ್ದಿರ
ನಮ್ಮ ಕದಗಳ ಆಗಾಗ ತಟ್ಟುತಿದ್ದಿರ
ತೆರೆಯದಿರಲು ಮರಳಿ ಹಿಂದಕೆ ಹೋಗುತಿದ್ದಿರ
ಬನ್ನಿ ನಗೆಗಳೆ ಬನ್ನಿ
ಕಿರುನಗೆ ಹೂನಗೆ ಮುಗುಳುನಗೆ ಬನ್ನಿ
ಕನ್ನೆಯರ ಕೆನ್ನೆಗುಳಿ ನಗೆ
ಪುಟ್ಟ ಮಕ್ಕಳ ಕಚಗುಳಿಯ ನಗೆ
ಎಲ್ಲ ನಗೆಗಳು ಬನ್ನಿ
ನಮ್ಮ ಕೂಟದಲಿ ಇರಿ ಬಂದು
ನಮ್ಮ ನೋಟದಲಿ ಇರಿ ಇಂದು
ತೊರೆದು ಹೋಗದಿರಿ ನಮ್ಮನೆಂದೂ
*****
