ನೀನು ಈ ಸರಳ ಜೀವನ ದಾರಿಯ
ಎಲ್ಲಾ ಸತ್ಯಗಳನ್ನು ನನಗೆ ತಿಳಿಸಿ ಹೇಳಬೇಕಾಗಿದೆ.
ಯಾವ ಅಹಂಕಾರವಿಲ್ಲದ ಒಂದು ಪ್ರೀತಿ
ನನ್ನ ಮನೆಯೊಳಗೆ ಅರಳಿ ಕಂಪು ಸೂಸಬೇಕಾಗಿದೆ.
ಈ ಜೀವನದಲಿ ಹೊಟ್ಟೆ ತುಂಬಿಸಿಕೊಳ್ಳುವ
ಮಾರ್ಗ ನೇರ ಮತ್ತು ಸಿಹಿ ನಿನ್ನಿಂದ ಆಗಬೇಕಾಗಿದೆ.
ಮಾತಿನಲಿ ಮೃದುತ್ವ ನಕ್ಷತ್ರಗಳ ಹೊಳಪು
ಮತ್ತು ನದಿಯ ಹರಿವಿಕೆ ನೀನು ತುಂಬಬೇಕಾಗಿದೆ.
ನನ್ನ ಬಳಗದ ಜನರೊಂದಿಗೆ ನೀಲಿ ಆಕಾಶದಲಿ
ರೆಕ್ಕೆ ಬಿಚ್ಚಿ ಹಾರಾಡುವದನ್ನು ನೀನು ಕಲಿಸಬೇಕಾಗಿದೆ.
ಅರಳುವ ಹೂವಿನ ಕಂಪಿನ ಬೆಳಕಿನ ಪ್ರಾರ್ಥನೆ
ನೀನು ನನ್ನ ಎದೆಯೊಳಕೆ ಇಳಿಸಬೇಕಾಗಿದೆ.
ನಾ ಯಾವ ಉದ್ದೇಶಗಳಿಲ್ಲದೇ ಬರೀ ಪ್ರೀತಿಯಿಂದ
ಅವರ ಕೈಗಳನ್ನು ಹಿಡಿದು ನಡೆಸಬೇಕಾಗಿದೆ.
ನೀ ಎಲ್ಲಾ ಒಲುಮೆಯ ಹಾಡುಗಳು ಇಂಪಾಗಿ
ಸೊಂಪಾಗಿ ಬದುಕಿನ ಆಳಕ್ಕೆ ಇಳಿಯುವಂತೆ ಮಾಡಬೇಕಾಗಿದೆ.
ಅದಕ್ಕಾಗಿ ದಯವಿಟ್ಟು ನೀ ಪ್ರೀತಿಯಿಂದ
ಚಿಟ್ಟೆಯಂತೆ ನನ್ನ ಒಮ್ಮೆ ಸ್ಪರ್ಶಿಸಬೇಕಾಗಿದೆ.
*****
