ನಚ್ಚಿನಾ ಸೋದರಿಯೆ ಕಡುಜಾಣೆ ನೀನಮ್ಮ
ಸ್ವಚ್ಛವಾಗಿದೆ ಮನವು ಮುದವಾಯಿತಮ್ಮ
ಅಚ್ಯುತಾನಂತದೊಳು ಎನಿಬರೆನಿಬರು ಉಂಟೊ?
ಸಚ್ಚರಿತ ಮಾನವರು ಶೀಲ ಸುಗುಣಾನ್ವಿತರು
ನಿನ್ನ ನುಡಿ ಹಿತವಿಹುದು ನಿನ್ನ ನಡೆ ಸೊಗವಿಹುದು
ನಿನ್ನ ಶ್ರಾವ್ಯದ ಗಾನ ಮಧುರವಾಗಿಹುದು
ಬಿನ್ನಾಣ ಬೆಡಗಿಲ್ಲ ಸಿಡುಕು ದುಡುಕುಗಳಿಲ್ಲ
ಸನ್ನುತಾಂಗಿಯೆ ರಸಿಕೆ ಸರಳ ಮಾನಸಳಮ್ಮ
ಸಕಲ ಕಲೆಗಳ ಒಳಗೆ ಅಕಳಂಕ ತುಂಬಿಹನು
ವಿಕಟ ಮಾನಸರಿದನು ತಿಳಿಯದಿಹರು
ಪ್ರಕೃತಿ ದೇವಿಯ ನೋಡೆ ನೃತ್ಯಗೈದಿಹಳಿಲ್ಲಿ
ಸುಖವಲ್ಲದೇ ಉಂಟೆ ದುಃಖವೀ ಜೀವನಿಗೆ
ಸಿರಿ ನಮಗೆ ಸ್ಥಿರವಲ್ಲ ಕಲ್ಪನೆಯ ಕೈಮರವು
ಕೊರತೆ ನಮಗೊಂದಿಲ್ಲ ತಿಳಿದಿಲ್ಲಿ ನೋಡೆ
ಹರಿಯ ಕೀರ್ತನೆ ಮಾಡಿ ವಿಜಯ ಧ್ವಜವನು ಹೂಡಿ
ಪರಮ ಸಂತೋಷದೊಳು ನಲಿವುದೇ ಸುಖವಮ್ಮ
ಯಾತ್ರಿಕರು ನಾವೆಲ್ಲಾ ನಿಯಮದಿಂ ಬಂದಿಹೆವು
ಕ್ಷೇತ್ರವೆಮಗೀ ಧರೆಯು ಕೇಳಮ್ಮ ತಂಗಿ
ಸತ್ಯಶೋಧನೆ ಇಲ್ಲೆ, ನಾಕನರಕಗಳಿಲ್ಲೆ
ನಿತ್ಯ ನಿರ್ಮಲಸ್ವಾಮಿ ಪ್ರತ್ಯಕ್ಷವಹುದಿಲ್ಲೆ
ನಾನು ನೀನೆಂದೆಂಬೊ ದ್ವೈತ ಭಾವಗಳಿಲ್ಲೆ
ಜ್ಞಾನಿ ತಾನರಿತಿರುವ ಅದ್ವೈತವಿಲ್ಲೆ
ಧ್ಯಾನಸಾಧನೆ ಇಲ್ಲೆ, ಫಲವನುಂಬುವುದಿಲ್ಲೆ
ಜನಕಜೆಯು ಅನುಭವಿಪ ಆನಂದವಿಹುದಿಲ್ಲೆ
*****
