ಪ್ರೀತಿಯ ಕಿಟಿ,
ಇವನ್ನೆಲ್ಲಾ ಹೇಗೆ ತೆಗೆದುಕೊಳ್ಳುವುದು ಎಂಬುದೇ ಯಾರಿಗೂ ಅರ್ಥವಾಗುತ್ತಿಲ್ಲ. ಈ ಕ್ಷಣದವರೆಗೂ ಯಹೂದಿಗಳ ಬಗೆಗಿನ ಸುದ್ದಿ ವಿವರ ನಮ್ಮವರೆಗೂ ಬಂದಿರಲಿಲ್ಲ. ಅಲ್ಲಿಯವರೆಗೆ ಸಾಧ್ಯವಾದಷ್ಟು ಖುಷಿಯಿಂದ ಇರುವುದೇ ಒಳಿತೆಂದು ತಿಳಿದಿದ್ದೆವು. ಆಗಾಗ ಮೇಪ್ ತನ್ನ ಗೆಳೆಯರಿಗಾದ ಸಂಗತಿಗಳನ್ನು ಬಂದು ಹೇಳಿದಾಗಲೆಲ್ಲಾ, ಮಮ್ಮಿ ಮತ್ತು ಶ್ರೀಮತಿ ವ್ಯಾನ್ಡ್ಯಾನ್ ಪ್ರತಿಸಲವೂ ಅಳುತ್ತಾರೆ. ಅದಕ್ಕಾಗಿ ಮೇಪ್ ಈಗೀಗ ಏನೂ ಹೇಳುವುದಿಲ್ಲ. ಆದರೆ ಈಗ ಡಸೆಲ್ ಬಂದ ಕೂಡಲೇ ಎಲ್ಲರಿಂದ ಮುಗಿಬೀಳುವ ಪ್ರಶ್ನೆಗಳು ಮತ್ತು ಅವರು ಹೇಳುವ ಕಥೆಗಳು ಅದೆಷ್ಟು ಭೀಬತ್ಸವಾಗಿರುತ್ತವೆ ಎಂದರೆ ಒಮ್ಮೆ ಕೇಳಿದ ಮೇಲೆ ಮುಗಿಯಿತು, ಅದನ್ನು ತಲೆಯಿಂದ ನಿವಾರಿಸುವುದು ಬಹುಕಷ್ಟ.
ಹೀಗಿದ್ದೂ, ಈ ಭೀಕರ ಸಂಗತಿಗಳೆಲ್ಲಾ ಸ್ವಲ್ಪ ಮನಸ್ಸಿನಲ್ಲಿ ಮಸುಕಾದಂತೆ, ನಾವು ಒಬ್ಬರನ್ನೊಬ್ಬರು ತಮಾಷೆ ಮಾಡುತ್ತ, ಜೋಕುಗಳ ಮಾಡುತ್ತ ಇರುವೆವು. ಇದರಿಂದ ನಮಗೆ ಒಳ್ಳೆಯದೇನೂ ಇಲ್ಲ ಹಾಗೇ ಹೊರಗಿದ್ದವರಿಗೆ ಇದರಿಂದ ಸಹಾಯವೇನೂ ಆಗಲ್ಲ. ಈಗ ಇರುವಂತೆ ಕತ್ತಲೆಯ ಬದುಕಿನಲ್ಲೆ ಇರಬೇಕಾಗಿರುವುದು. ನಮ್ಮ ಗುಪ್ತ ಗೃಹಯನ್ನು ಇನ್ನು ’ಗುಪ್ತ ಕತ್ತಲೆ ವಾಸ’ ಎಂದು ಮಾಡುವುದಾದರೆ ಏನೆಲ್ಲಾ ಬೇಕಾಗಬಹುದು? ನಾನೇನಾದರೂ ಮಾಡುತ್ತಿರಲಿ, ಆದರೆ ಉಳಿದವರ ಬಗ್ಗೆ ಕೂಡಾ ನಾನು ಯೋಚಿಸಬೇಕಲ್ಲವೇ? ಯಾವುದೋ ಕಾರಣಕ್ಕೆ ನನಗೆ ನಗಬೇಕಾಗಿದೆ, ಅದನ್ನು ಆ ಕ್ಷಣ ಅದುಮಿಕೊಳ್ಳಬೇಕೆ? ನಾನು ಖುಷಿಯಾಗಿದ್ದದ್ದಕ್ಕೆ ನಾನೇ ನಾಚಿಕೆಪಟ್ಟುಕೊಳ್ಳಬೇಕೆ? ಆ ಇಡೀ ದಿನ ನಾನು ಅಳುತ್ತಾ ಇರಬೇಕಾಗುವುದಲ್ಲವೇ? ಇಲ್ಲ, ಅದು ನನಗೆ ಸಾಧ್ಯವಿಲ್ಲ. ಇದೆಷ್ಟು ದಿನ. ಈ ಕತ್ತಲು ಸ್ವಲ್ಪ ದಿನಕ್ಕೆ ಕಣ್ಮರೆಯಾಗಬಹುದು.
ಈ ಕಷ್ಟದ ಜೊತೆಗೆ ಇನ್ನೊಂದು ಸಂಗತಿ ಸೇರಿಸುತ್ತಿದ್ದೇನೆ, ಅದರಿದು ಕೇವಲ ನನ್ನ ಖಾಸಗಿ ವಿಚಾರ. ಯೋಚಿಸಿದರೆ ಇದು ಈ ಮೊದಲೇ ಹೇಳಿದ ಎಲ್ಲ ಸಂಕಟದ ಸಂಗತಿಗಳ ಮುಂದೆ ಅಂತಹ ಮಹತ್ವದ್ದಲ್ಲ. ಆದರೂ ನಾನಿದನ್ನು ಹೇಳದೇ ಹಾಗೆ ಅದುಮಿಟ್ಟುಕೊಳ್ಳಲಾರೆ. ಇತ್ತಿಚೆಗೆ ನಾನು ಏಕಾಂಗಿತನವನ್ನು ಅನುಭವಿಸುತ್ತಿದ್ದೇನೆ. ನನ್ನ ಎಲ್ಲರೂ ದೂರಮಾಡುತ್ತಿದ್ದಾರೆ ಎನ್ನಿಸುತ್ತಿದೆ. ಹಿಂದೆಂದೂ ನನಗೆ ಹೀಗಾಗಿರಲಿಲ್ಲ. ನನ್ನ ತಮಾಷೆಗಳು, ಹುಡುಗಾಟ, ನನ್ನ ಸ್ನೇಹಿತೆಯರು ಇವೇ ನನ್ನ ಮನಸ್ಸನ್ನು ತುಂಬಿದ್ದವು. ಆದರೆ ಈಗೀಗ ಬೇಜಾರಿನ ಸಂಗತಿಗಳ ಬಗ್ಗೆ ಇಲ್ಲವಾದರೆ ನನ್ನ ಬಗ್ಗೆ ಮಾತ್ರ ಯೋಚಿಸಬಲ್ಲೆ. ತುಂಬಾ ದಿನಗಳ ಹಿಂದೆ ಡ್ಯಾಡಿಯ ಬಗ್ಗೆ ಯೋಚಿಸಿದ್ದೆ. ಅವರು ನನ್ನ ಅತಿ ಪ್ರೀತಿಪಾತ್ರರು. ಆದರೂ ನನ್ನ ಪುಟ್ಟ ಜಗತ್ತಿನಲ್ಲಿ ಕಳೆದುಹೋದ ಎಲ್ಲ ದಿನಗಳಲ್ಲಿ ಅವರು ಸ್ಥಾನ ಪಡೆಯಲಾರರು. ನಾನೇಕೆ ನಿನಗೆ ಇಂತಹ ಮೂರ್ಖ ಸಂಗತಿಗಳ ಬಗ್ಗೆ ಹೇಳಿ ಬೇಸರಗೊಳಿಸುತ್ತಿರುವೆ? ನಾನು ಕೃತಘ್ನಳು, ಕಿಟಿ: ನನಗೆ ಗೊತ್ತು. ಆದರೆ ನಾನೇನಾದರೂ ಅದರಲ್ಲಿಯೇ ಮುಳುಗಿದರೆ ನನ್ನ ತಲೆ ಅಲ್ಲೇ ಸುತ್ತುವಂತೆ ಆ ಬಗ್ಗೆಯೇ ಚಿಂತಿಸುವಂತೆ ಮಾಡುತ್ತಿರುತ್ತದೆ. ನಾನು ಉಳಿದ ಇನ್ನಿತರ ಸಂಕಟಗಳ ಬಗ್ಗೆ ಚಿಂತಿಸುವುದು ಆಮೇಲೆ.
ನಿನ್ನ,
ಆನ್
*****
