ಅಲ್ಲಿ ಸಾಮ್ರಾಜ್ಯವಿತ್ತು, ಸಕಲ ಸಂಪತ್ತಿತ್ತು,
ಕುಬೇರನ ಖಜಾನೆಯಿತ್ತು!
ಇಂದಿಗೆ ಭಾರತೀಯರಿಗೆ ತಿನ್ನಲು ಕೂಳಿಲ್ಲ;
ಕುಡಿಯಲು ನೀರಿಲ್ಲ!
ಅದೊಂದು ಪರಮ ವಿಚಿತ್ರ!
ವಿಲಾಯತಿಯಲ್ಲಿ ಗಡ್ಡೆಗೆಣಸಿತ್ತು,
ಅರೆದು ತಿನ್ನಲು ಮೆಣಸಿರಲಿಲ್ಲ;
ಇಂದಿಗೆ ಸಕಲ ಸಂಪತ್ತು ಸುರಿದಿಹುದಲ್ಲಿ,
ಸೃಷ್ಟಿಯ ಕೊಳುವ ಕುಬೇರರಲ್ಲಿ!
ಇದೊಂದು ಪರಮ ವಿಚಿತ್ರ!
ತಾಯ್ನಾಡಿನಲ್ಲಿ ಕೋಟ್ಯಾನುಕೋಟಿ ಜನರು,-
ಆದರೆ ದಾಸಾನುದಾಸರಿಹರು!
ಬ್ರಿಟನ್ನಿನಲಿ ಕೆಲವು ಲಕ್ಷ ಜನರು-
ಆದರೆ ಸಮ್ರಾಟರಿಹರು!
ಇದೊಂದು ಪರಮ ವಿಚಿತ್ರ!
ಭಾರತದಲ್ಲಿಲ್ಲದ್ದು ವಿಶ್ವದಲ್ಲಿಯೇ ಇಲ್ಲ-
ಲಕ್ಷ್ಮಿ ಸರಸ್ವತಿಯರ ತವರ್ಮನೆಯದು!
ತಕ್ಕಡಿಯ ಹಿಡಿದು ತಲೆದೂಗುತ್ತ
ಬ್ರಿಟಿನ್ನರು ಬರುತಿದ್ದರಲ್ಲಿ.
ಇಂದು ಬ್ರಿಟನ್ನಿಗೆ ನಡೆದಿಹರು ಜೊತೆಗಾರರು,-
ಹಿಡಿ ಹೊನ್ನಾಸೆಗೆ.
ನಡೆದಿಹೆನು ನಾನು,-ವಿದ್ಯೆ ಪಡೆಯಲೆಂದು!
ಇದೊಂದು ಪರಮ ವಿಚಿತ್ರ!
*****
