ಕುಸಬಿ ಬಡಿಯುವದು

ಕೋಲುಕೋಲನ್ನಿರೇ ||ಪ||

ಹಸನುಳ್ಳ ಬಾಲೆಂತ ಹಂತೇಲಿ ಹೋದರ ಕೋಲುಕೋಲನ್ನಿರೇ |
ಕೊಸರಿ ಕೊಸರಿ ಎನ್ನ ಕೈ ಮೈ ಹರಿದಾಳ ಕೋಲುಕೋಲನ್ನಿರೇ ೧

ಕೊಸರಿ ಕೊಸರಿ ಎನ್ನ ಕೈ ಮೈ ಹರಿದಾಳ ಕೋಲುಕೋಲನ್ನಿರೇ
ರನ್ನದ ಕುಡಗೋಲಿಲೆ ಕುತ್ತಿಗೆ ಕೊಯ್ದಾರ ಕೋಲುಕೋಲನ್ನಿರೇ ೨

ರನ್ನದ ಕುಡಗೋಲಿಲೆ ಕುತ್ತಿಗೆ ಕೊಯ್ದಾರ ಕೋಲುಕೋಲನ್ನಿರೇ
ಎರಿ ಹೆಂಟೆಯೆತ್ತಿ ಎದೆಮ್ಯಾಗ್ಹೇರ್ಯಾರ ಕೋಲುಕೋಲನ್ನಿರೆ ೩

ಎರಿ ಹೆಂಟಿಯೆತ್ತಿ ಎದಿಮ್ಯಾಗ್ಹೇರ್ಯಾರ ಕೋಲುಕೋಲನ್ನಿರೇ
ಹಾದೀಗೆ ತಂದು ಹರಿವ್ಯಾರವಳನ್ನ ಕೋಲುಕೋಲನ್ನಿರೆ ೪

ಹಾದೀಗೆ ತಂದು ಹರಿವ್ಯಾರವಗಳನ್ನ ಕೋಲುಕೋಲನ್ನಿರೇ
ಗಿಲಕೀಯ ಬಡಗೀಲೆ ನೆಲುಕೂಸಿ ಬಡಿದಾರ ಕೊಲುಕೋಲನ್ನಿರೆ ೫

ಗಿಲಕೀಯ ಬಡಿಗೀಲೆ ನೆಲುಕೂಸಿ ಬಡಿದಾರ ಕೋಲುಕೋಲನ್ನಿರೇ
ಗಾಳೀಗೆ ತೂರಿ ರಾಶೀಯ ಮಾಡ್ಯಾರ ಕೋಲುಕೋಲನ್ನಿರೆ ೬

ಗಾಳಿಗೆ ತೂರಿ ರಾಶಿಯ ಮಾಡ್ಯಾರ ಕೋಲುಕೋಲನ್ನಿರೇ
ರನ್ನದ ಗೋಣ್ಯಾಗ ತುಂಬ್ಯಾರಗಳನ್ನ ಕೋಲುಕೋಲನ್ನಿರೆ ೭

ರನ್ನದ ಗೋಣ್ಯಾಗ ತುಂಬ್ಯಾರವಳನ್ನ ಕೋಲುಕೋಲನ್ನಿರೇ
ಚೆನ್ನಬಸವನಮ್ಯಾಲೆ ಹೇರ್ಯಾರವಳನ್ನ ಕೋಲುಕೋಲನ್ನಿರೆ ೮

ಚೆನ್ನಬಸವನಮ್ಯಾಲೆ ಹೇರ್ಯಾರವಳನ್ನ ಕೋಲುಕೋಲನ್ನಿರೇ
ಜಮಖಂಡಿ ಪ್ಯಾಟೀಗ್ಹಚ್ಚಾರವಳನ್ನ ಕೋಲುಕೋಲನ್ನಿರೆ ೯

ಜಮಖಂಡಿ ಪ್ಯಾಟೇಗ್ಹಚ್ಚಾರವಳನ್ನ ಕೋಲುಕೋಲನ್ನಿರೇ
ಗಂಡಂಬುರಾಯ ಕೊಂಡಾರ ಒಯ್ದಾನ ಕೋಲುಕೋಲನ್ನಿರೆ ೧೦

ಗಂಡಂಬುರಾಯ ಕೊಂಡಾರ ಒಯ್ದಾನ ಕೋಲುಕೊಲನ್ನಿರೆ
ಅತ್ತೆಂಬು ರಂಬಿ ಹೊತ್ತಿಸಿ ಹುರಿದಾಳ ಕೋಲುಕೋಲನ್ನಿರೆ ೧೧

ಅತ್ತೆಂಬು ರಂಬಿ ಹೊತ್ತಿಸಿ ಹುರಿದಾಳ ಕೋಲುಕೋಲನ್ನಿರೇ
ಮಾವಂಬು ರಾಯ ಮನ್ನೂಸಿ ಉಂಡಾನ ಕೋಲುಕೋಲನ್ನಿರೆ ೧೨

ಮಾವಂಬು ರಾಯ ಮನ್ನೂಸಿ ಉಂಡಾನ ಕೋಲುಕೋಲನ್ನಿರೇ
ಬಲ್ಲಿದರೆಲ್ಲ ಇದರರ್ಥ ಒಡಿರೆಂದು ಕೋಲುಕೋಲನ್ನಿರೆ ೧೩
*****