೧
ನನ್ನಯೀ ನಾಡಿನಲ್ಲೊಪ್ಪನ್ನು ಹಾಕಿದಂತಹ ಒಪ್ಪೆ ಇಂದು ಒಪ್ಪು!
ನನ್ನಿಯಲಿ ನಾಡನ್ನು ನೆನೆಸಿದಂತಹ ನನಸೆ ಬಿಗಿತಾಗಿ ಬಂದು ಅಪ್ಪು!
೨
ತಾಯಿಯೊಡಲಿನ ಕಡಲಿನಲ್ಲಿದ್ದ ಸವಿಸವಿದು
ಸವಿಯು ನೀನಾಗಿ ಬಂದು
ಸಾಯಲಿಕ್ಕಾದ ಜಗದಲ್ಲೆಲ್ಲ ಸವಿ ಸುರವಿ
ಸೀ ಮಾಡಿ ಬಿಟ್ಟೆ ಅ೦ದು!
೩
ಮುಗಿಲಿನಲಿ ಮೊಳಮೊಳಗುವಂಥ ‘ಬಿಚ್ಚ’ ನ್ನೊಡನೆ
ತಂದು ಬಂದೀ ಜಗಕ್ಕೆ
ತಗಲಿಸಿದಿ–ದಾಸ್ಯದಿಂದಗಲಿಸಿದಿ ಮಾಧವನೆ!
ಜಯ ನಿನ್ನಯಾ ಮೊಗಕ್ಕೆ!
೪
ಜೀವಕಳೆಯಳಿದಂಥ ಜನರ ಮೈ-ಮನಸು-ಮಾತುಗಳಲ್ಲಿ
ಪ್ರೀತಿಯಿಂದ
ದೇವನಲ್ಲಿರುವಂಥ ಸೊಗಸನ್ನು ಸೃಜಿಸಿದೆಯೊ
ಸೊಬಗುಳ್ಳ ರೀತಿಯಿಂದ!
೫
ಕಲಿಗಳನ್ನು ಕನ್ನಡದ ರಾಜ್ಯದಲ್ಲಿ ಕಲ್ಪಿಸಿದಿ
ನಿನ್ನಯಾ ರಾಜ್ಯದಲ್ಲಿ!
ಕಲಿಯುಗದ ಹೊಟ್ಟೆಯೊಳು ಕೃತಯುಗವ ಹುಟ್ಟಿಸಿದಿ
ಅಂದು ಸ್ವಾರಾಜ್ಯದಲ್ಲಿ!
*****
